‘Premier’ tras di telon Silvania ke kibra akuerdo riba Wardakosta

WILLEMSTAD. E fin di siman ku nos a drenta lo marka historia kaminda praktikamente a keda demostrá ku no ta Pik Pisas ta promé minister sino minister di Finansa de fakto ta zwai batuta den desishonnan fundamental den nos pais.
Aparte ku e manera konvenshonal ku e minister ta obra i papia, e ta tuma desishon pa kartera di otro minister i nan ministerio riba tereno sosial i di Hustisia i pa kolmo di un manera denigrante via Facebook ku no ta un kanal ofisial den nos konstelashon gubernamental.
Den seno di koalishon e partner PNP a reklamá pero no ta komparti nan reklamonan ku pueblo ni nan propio fanatikada.
Un dje ultimo patrañanan ku e minister di Finansa a kometé ta ku via di Facebook ela hasi un apelashon riba minister di Hustisia Shalten Hato pa kibra e akuerdo di gobernashon ku Kòrsou a firma ku Ulanda kon ta finansia Wardakosta.
E forma denigrante ku e minister ta komunika ku su fanatikada riba temanan di gobernashon ku a kai bou di otro minister ta krea impreshon ku e tin nan pa poko bubè ku no tin e kapasidat pa desplegá kiko nan mester hasi.
E uniko (èks mandatario) ku a reakshoná i alabes lider di partido PAR, Girigorie, kui a reakshoná kontra e andanada di rekriminashon ku Silvania a lansa den su direkshon, parse ku tambe a tira sèrbètè pa lansa e minister lastra nan manera e ta haña ta bon.