Preis di poduktonan na Boulevard Market Place ta yega te den nubia!!

WILLEMSTAD. No por bisa ta ki fórmula e supermerkado Boulevard Market Place ta apliká den kalkulashon di preis di komestibel pero sí por bisa ku e preis di sierto produkto ta kasi kriminal. Preis di kasi 100% mas karu pe mesun produkto na otro supermerkado ta insólito pero ta keda na e konsumidó pa disidi unda e ta kumpra. Ounke ta difisil pa e konsumidí di Steenrijk, Marie Pompoen, Oranjestraat i Penstraat kore bai te kaminda di Bandabou pa haña mihó preis.
P’esei Fundashon pa Konsumidó ta rekomendá e konsumidó pa hasi uzo di e lista amplio di nan komparashon di preis pa por hasi eskoho di forma konsiente.
Esaki ta hopi importante mirando ku tin diferensia basta grandi den preis entre supermerkadonan. Un ehèmpel di esaki ta e diferensia grandi den preis di belèg.
Na CarreFoure bo por kumpra un kilo di wòrs dushi pa 23 florin pero bo ta haña e mesun kilo di wòrs dushi aki pa 47,95 florin na Boulevard Market Place. Esaki ta un diferensia di 24,50 florin. Meskos den e parti di berdura bo por kumpra 1 kilo di broccoli na Esperamos supermarket pa 8,63 florin i na Boulevard Market Place e preis ta 25.95 florin pa 1 kilo. Esaki ta un diferensia di 17,32 florin.
En bista di e subida di preis ku ta tuma lugá i e diferensia di preis entre establesimentunan nos mester keda mantené nos mes bon informá pa asina kumpra di forma responsabel.
Bo por tuma nota di e lista di anotashon di preis riba nos wèpsait www.fundashonpakonsumido.org. Pa kualkier pregunta por tuma kontakto ku nos na 462-6666 òf manda nos un e-mail na
info@fundashonpakonsumido.org.Tene na kuenta ku pa e komparashon di preis aki no a tene kuenta ku kalidat di produkto ni pais di importashon.