Por lo pronto problematika di MRI na CMC ta keda vigente

WILLEMSTAD – Porfin CMC Medical Center a sali den publisidat relashona ku e problema ku tin ku e mashin di MRI na e hospital. NOBO tin informashon ku tin hopi hende pendiente pa haña un sita pa tratamentu den e mashin aki, ku tin algun tempu kaba daña. Nos tin informashon di hende ku ta desesperá pasobra CMC a referi nan pa Advent Hospital pa traha un sita pa pasa den e mashin di MRI. Pero e sita ta hopi leu i Mientrastantu e doló ku e ta sinti ta insoportabel. Mientrastantu parlamentario Elvin Gerard tambe ta kuestiona e situashon na CMC, kaminda e mashin di MRI ta asina tantu tempu sin ta funshona i ku pashentnan ta birando viktima.
Dito Garmers di CMC Vastgoed a duna un splikashon tékniko di e situashon dje MRI i ela deklará ku e problema dje MRI di CMC ta kompliká. Ta trata di e magneet di e aparato, ku a daña. E MRI ku CMC tin, ta un mashin ku a hinka den e edifisio durante di konstrukshon dje hospital, for di 2018. Esaki tabata nesesario, pa despues por kaba di konstrui e murayanan rondó di e mashin, pasobra di otro manera e no por pasa debi ku e ta muchu grandi. Entretantu CMC a yega na e konklushon ku tin indikashon ku mester remplasa e MRI. CMC ta warda riba resultado di un investigashon ku ela kuminsa un tempu pasá, pa kuminsa ku e proseso pa claim esun ta responsabel pa e desperfekto na e MRI. Garmes a menshona tambe ku ora ku e hospital nobo a habri, tur ta ekiponan nobo, inkluso e MRI.
AKSHON
For di momentu ku e mashin di MRI a daña i ta for di servisio, na januari ultimo, CMC a aserka Advent Hospital, pa akapara e pashentnan. E pashentnan ku tin mester di un tratamentu bou di MRI ta sigi . E pashèntnan ta bai riba un lista di espera, ku awor ta birando largu, segun Garmers.
Un otro akshon ku CMC a tuma, tabata banda dje investigashon ku ta tumando luga, kumpra un mashin nobo. Segun Garmers, despues di un investigashon preliminar CMC a konklui ku no ta bale la pena pa remplasa e aktual mashin di MRI. E mashin no ta den servisio mas mientras ku pa e gastunan, ta kumbini mas pa kumpra un mashin nobo. Mientrastantu mester sigi vigila e proseso di claim ku tin, segun Dito Garmers.
CMC ta trahando pa resolve e situashon, pero e proseso ta tuma un tiki tempu. CMC ta spera ku pa november awor e ta dispone di un MRI nobo, ku ta kosta den kareda di 1 mion dollar.
Pa loke ta konserni e investigashon, CMC a laga un ofisina internashonal huntu ku speshalistanan di MRI hasi un investigashon. Garmers ta verwagt ku pa e luna aki mes, CMC ta haña un rapòrt. Pero e desaroyonan aki no ta stroba e proseso pa yega na un MRI nobo pa CMC.