Por laga di ta di oro pero……. ENNIA/Banko Sentral lo ta loko pa bende Banco di Caribe

WILLEMSTAD. Definitivamente tin un korto sirkuito den interpretashon dje veredikto ku Korte a dikta dia 28 di luna pasá riba e demanda di Parman (Ansari) kontra ENNIA/Banko Sentral kaminda Ansari a hasi un seri di eksigensia na Banko Sentral pa lanta e medida di emergensia ku tin riba ENNIA i bou di kual ta kai tur e kompanianan ku ta den e pakete di ENNIA Holding. Tabatin vershonnan periodistiko ku tabata hasi menshon dje hecho ku Banco di Caribe ta na benta siendo ku loke ta pasa ta ku Banko Sentral i ENNIA tin outoridat di Korte pa eventualmente chèk e posibilidat di bende e banko i otro empresanan di Ansari pa haña e kapital ku Ansari lo a saka for di ENNIA den transkurso di añanan. Banko Sentral a base di su outoridat komo supervisor di reglanan bankario den nos pais a haña e pèrmit nesesario di Korte pa tuma e pasonan nesesario pa kapitalisá ENNIA ku e fondonan nesesario pa garantisá ku ningun kliente di ENNIA no ta keda perhudiká pa e falta di kapitalisashon dje empresa.
Na mesun tempu NOBO a komprondé ku ningun momento tabata den tapara pa bende Banco di Caribe pasobra e banko por laga di pone webu di oro pero e ta pone webu di más ku plata i ta un propiedat valioso den e kadena di propiedatnan ku ta kai bou di ENNIA Holding.
Banko Sentral ayera a splika kiko e areglo di emergensia di Banko Sentral riba ENNIA ta nifika pa ‘entre otro’ ENNIA Caribe Leven NV i ENNIA Caribe Holding NV (ENNIA).
Meta di e areglo di emergensia ta pa restrukturá ENNIA i asina restourá su solvensia pa kumpli ku nan obligashon pa ku e doñonan di polisa di ENNIA.
Den kuadro di esaki e hendenan di Banko Sentral ku ta supervisá operashon di ENNIA i su kompanianan, nan ta investigá tur opshon ku ta kontribui na un restrukturashon eksitoso dje kompania.
Un dje opshonnan ku ta ser investigá ta e posibilidat pa bende propiedat di ENNIA ku den e kaso aki ta e opshonnan ku ENNIA tin den Banco di Caribe.
Banco di Caribe mes no ta kai bou dje areglo di emergensia manera nan a bisa anteriormente kaba pasobra no tin motibu pa esaki.
Banco di Caribe ta un propiedat valioso ku ta duna un kontribushon positivo na e grupo ENNIA den su totalidat.
Un eventual venta di Banco di Caribe lo krea entrada ku lo ta benefisioso pa e restrukturashon di ENNIA pero den tur loke Banko Sentral hasi den kuadro dje restrukturashon di ENNIA, interes dje depositornan ta bin na promé lugá.