Politur tambe ke avisá turistanan: riba areanan peligroso pa atrako

WILLEMSTAD -Ta importante pa e turistanan ku ta bishita nos isla ta konsiente di kua area nan no mester frekuenta, prinspalmente ora ku bira skur. Asina Humphrey Josefa presidente di Politur a bisa, den un komentario riba un resiente kaso di atrako riba turista ku a tuma luga na Baya Beach. Atrako riba turista ta malu pa nos turismo Kòrsou i ta malu pa nos imagen. Humhrey Josefa, direktor di Politur.

‘Ta algu ku mester rechasa kategorikamente’.
Josefa a sigi bisa ku un turista ta bin Kòrsou pa konose e isla pasobra ela kompronde ku na Korsou ta safe. E turistanan ke konose i eksplorá prinsipalmente a partinan bunita di Korsou entre otro e playanan di Parke Sint Kristofel. Pa loke ta trata Baya Beach, Josefa ta splika ku ta un area alehá.

E ta un parti hopi bunita di Kòrsou i turistanan ta bishita e sitio.

Den hopi kaso e turistanan ta stashoná nan outo leu, laga nan pertenensianan aden.

E konsekuensia ta ku malechornan por kibra e outo i bai ku e kosnan. Josefa: ‘’Esei a sosode na varios okashon.’’
E presidente di Politur ta menshona ku regularmente tin patruya na varios parti di Korsou, pero ta un realidat tambe ku Politur tin skarsedat di personal.

Den pasado Politur tabata traha ku kuerpo polisial, pero e kuerpo di polis mes tin skarsedat di personal. Konsekuentemente for di sinku ana pasa , polisnan no ta forma parti di Politur mas.

Mientrasantu otro ana Politur ta kumpli 10 ana di eksistensia, di kua e último sinku anan di polis, pero ku refuerso di un kompania di seguridat.

E personanan aki obligatoriamente mester a sigi un kurso di ‘buitengewone agent van politie’.

Esei ta hasi posibel e trahadónan dje kompania di seguridat por traha na Politur, pero e kantidat ta limitá.

INFORMASHON
TA YUDA
E manera pa evita e kasonan di atrako riba turistanan ta dor di duna e turistanan informashon, asina Humphrey Josefa ta bisa ku e suministro di informashon ta loke ku Politur a hasi den pasado, pa medio di publikashon di entre otro foyetonan. A duna splikashon na diferente idioma informanan riba asuntunan importante manera no kana anochi ku paspoort, no laga pertenensianan den outo.

A reparti e foyetonan na varios hotel. Josefa ta indika ku lo ta bon pa bolbe produsi i reparti e foyetonan.

Esaki ta rekomendabel ounke ku den pasado no ta tur hotel tabata entousiasma pa parti e foyetonan pasobra nan ta opina ku e informashon por ‘spanta’ e turistnan. Josefa ta realisa sinembargo ku ta mas miho pa informa e turista, meskos ku ta tuma luga ront mundu, riba e aeranan peligroso of di riesgo.
Esei ta pone ku e turista por tene kuenta i ta evita di haña su mes den situashonnan riskante.

E suminstro di informashon, mester ta un ehersisio komun di Politur, Ofisina di turismo, Polis i tambe e sektor hotelero.