Polis na Inglatera a detené: Lider di un geng ku a trafiká ku por lo ménos 1.900 migrante

LONDRES – Djasabra agentenan Federal den kordinashon ku polis di Scotland Yard a logra detené e notorio trafikante di hende identifiká komo Tarik Namik. Parse ku Tarik Namik a keda kondena for di desèmber di aña 2022 na 8 aña di kastigu di prizon pa e delito di trafikashon di Kurdonan prosedente for di Iran i Irak.
Tabatin un órden di kaptura Internashonal pa Tarik Namik debí ku ela trafiká ku migrantenan Kurdo di Iran i Irak pa Fransia i Alemania kaminda hustisia ta ward’é ku brasa habri na momentu ku e kaba di sinta su kastigu di prizon na Inglatera.
Tarik Namik tabata kobra e migrantenan Kurdo entre 1.800 euro pa 2.000 euro pa un biahe pa sea Alemania, Fransia Inglatera of Hulanda den trùk di karga.
Te kuné momentunan aki tin 5 persona a keda kondena na kastigu di prizon pero tabata falta solamente Tarik Namik ku tabata fugitivo di hustisia for di aña pasa.
Richard Harrison di servisio di Inteligensia Britániko a splika ku e grupo di delinkuentenan a kuminsá ku e negoshi lukrativo aki for di 2017 i tabatin transportá kurdonan di Iran i Irak pa e paisnan menshoná den Europa.