Polis na Honduras a detené: Seis persona relashoná ku e asesinato di yu di eks presidente Lobo Sosa

TEGUCIGALPA – Gustavo Sánchez Velasquez direktor PNH (Policía Nacional de Honduras) a konfirmá djasabra ku ya kaba tin seis persona detené relashoná ku e kaso di asesinato di kuater persona inkluyendo e yu hòmber di eks presidente Porfirio Lobo.
E kaso di masakre a tuma luga djaweps mardugá na momento ku tres vehíkulo ku tabatin 11 miembro di Mara Salvatrucha MS-13 a blòkia SUV ku Said Lobo yu hòmber di eks presidente Porfirio Lobo tabata aden.
Gustavo Sánchez Velasquez a indika ku agentenan federal huntu ku polis lokal na Honduras a traha duru pa solushoná e kaso aki mas lihé ku ta posibel.
E sikarionan ku a keda detené a kuminsá basha abou kaba ku un konosido empresario lo ta e outor intelektual ku a paga lider di Mara Salvatrucha MS-13 un suma di $200 mil pa likidá Said Lobo.
E otro hóbennan ku a pèrdè nan bida den e kaso aki tabata na mal momento huntu ku Said Lobo ku tabata e ophetivo.
Gustavo Sánchez Velasquez a splika ku falta 5 miembro mas di Mara Salvatrucha MS-13 pa outoridatnan mester detené ainda.