Polis na Ecuador a logra: Detené sospechoso di atake ku eksplosivo ku a laga 5 morto

QUITO – Patricio Carrillo minister enkargá ku e kartera di hustisia na Ecuador a konfirmá ku outoridatnan a logra detené e sospechoso ku a kometé e atentado ku a laga 5 morto i 17 herido djadumingu último na Guayaquil.
E hòmber ku polis a detené i ku a atmití ku ela kometé e krímen aki tin antesedente kriminal pa asesinato i ladron.
E atentado no solamente a laga un saldo di 5 morto i 17 herido atras sino a kousa daño na ocho kas di famia na e bario Cristo del Consuelo.
Patricio Carrillo a splika ku esaki ta e tipo di delinkuensia ku tin na Ecuador kaminda kriminalnan ta kometé atentado ku bòm awor pa mata hopi hende pareu.
Durante e operativo polis a haña bastante arma, munishon i handgranat na kas di e delinkuente.
Pa lokual ta e otro kriminal ku tabata huntu ku e sospechoso ku a komete e krímen polis no a logra buta man riba dje ainda pero pronto esaki lo pasa.
Ecuador a bira un pais bastante peligroso debí ku Kartelnan di droga for di Colombia, Mexico i Honduras tin e pais komo hup pa manda droga Merka i Europa. Patricio Carillo a bisa pa lokual ta promé parti di aña 2022 ya kaba tin 861 kaso di asesinato registrá na Ecuador.