Internashonal
Polis federal na Brazil a identifiká restunan di periodista britániko Dom Phillips
BRAZILIA – Polis Federal di Brasil a anunsiá ayera ku nan a logra identifiká restunan di e periodista Britániko Dom Phillips ku a keda raporta desaparesé for di dia 5 di yüni último na Amazonía den kompania di e defensor di indígena Brasileño ku yama Bruno Pereira.
Aparentemente a haña restunan di Dom Phillips i Bruno Pereira deskomponé den selvanan di Amazonia.
E forma ku por a identifiká Dom Philips tabata a base di eksamen di odontologo forense kombiná antropologia forense.
Polis federal a logra detené e asesino di Dom Phillips i Bruno Pereira ku a keda identifiká komo Amarildo da Costa de Oliveira alias ‘Pelado’.
Amarildo da Costa de Oliveira a konfesá na outoridatnan ku ela asesiná Dom Phillips i Bruno Pereira pa despues dera ámbos den selvanan di Amazonia.
Kaminda Dom Phillips i Bruno Pereira tabata sirkulá ta un luga kaminda tin hopi aktividat di trafikashon di droga.
Pero outoridatnan na Brazil lo tin ku presentá mas informashon dikon a asesiná Dom Phillips i Bruno Pereira.