Piskadó hòben perdí riba laman

Ayera tardi pa mas o menos dos or Kuerpo polisial a notifika Wardakosta ku nan Sentral di polis a risibí informashon ku un hòmber ku tabata ku dos amigu ta piska riba laman entre Daaibooi ku restaurant Karakter ta perdí riba laman. E hòmber a bula for di e boto pa bai tira piska anto no a regresá.

E dos amigunan a buska pa un ora i despues a alarmá polis. Mes ora Wardakosta a manda un Metal Shark pa buska e hòmber mientras ku polis ja a manda un unidat pa kuminsa buska for di tera.

E helikopter di Wardakosta a djoin e búskeda i mas lat e avion Dash tambe.
Lastimamente no a enkontra e hòmber. Awe mainta e avion di Wardakosta lo sigi ku e búskeda. E hòmber ta bistí ku un karson kòrá i un t-shirt blou.
Djadumingu 7 di novèmber 2021 alrededor di 14.19’or, Sentral di Polis a risibí informashon ku tin un hòmber perdí riba laman. Informashon ku Sentral di Polis i e unidat di Barber a logra kompilá ta, ku tres hòmber lo tabata den un boto ta piska den área di playa di Daaibooi.

Diripiente un di e hòmbernan a bula na awa pa e bai tira piská. Pero e dos amigunan ku a keda den e boto, lo a pèrde e hòmber aki despues for di bista. Despues ku ya nan tabatin alrededor di un ora ta buska sin resultado, nan a bati alarma na Sentral di Polis, ku na su turno a pone Wardakosta inmediatamente na altura.

Alabes a dirigí e unidat di Barber pa Daaibooi pa kuminsá ku un búskeda for di tera.

Personal di Wardakosta a inisiá ku un búskeda intensivo tantu ku helikòpter i ku boto, pero te na e momentunan aki, sin por a lokalisá e persona perdí. E hòmber aki di mas o menos 18 aña, tabata bistí ku un flanèl blou i un karson kòrá.