Pisas tampoko ta kontestá karta di parlamentarionan di oposishon

WILLEMSTAD. E parlamentario Steven Croes di frakshon di PAR den parlamento a manda un sèt di pregunta pa minister Pik Pisas riba e proseso ku ta andando pa habri Refineria di Kòrsou mirando e último desaroyonan ku awor ta toka Bullenbaai.
Na yuli tambe Steven Croes a manda un karta pa Pisas ku pregunta riba RdK.
Awe fin di ougùstùs ainda esaki no a wòrdu kontesta i ku e desaroyonan nobo rondó e “preferred bidder” i uso di e terminal di Bullenbaai, Croes a bolbe manda un karta den kual e ta puntra pa kontestá e promé karta i e karta aki ku mas pregunta dirigí pa ku Bullenbaai.
Dia 15 sèptèmber awor ta hasi 1 aña ku Minister Pisas no ta informando parlamento di nada i e hecho ku e no a kontesta e karta di dia 21 yüli 2022, ta hasi e asuntu aki mas i mas preokupante i asta dudoso.
Refineria di Kòrsou a anunsia publikamente ku lo bai kuminsá opera Bullenbaai promé ku a yega na un “Heads of Agreement” ku operador di refineria mes. Esaki ta un punto ku ta lanta masha hopi pregunta. Atrobe sr. Pisas no ta splika e proseso kla i unda gobièrnu ta ku e negosiashonnan, di manera ku pueblo por tin bista kiko ta pasando.
E asuntu aki ta hopi serio i Minister mester duna klaridat i transparensia.
Otro punto: Premier Pisas a deklará den un programa di televishon ku e lo entrega yabi di refineria dia 1 di yüni. No solamente esaki no a sosodé, pero lo a desviá kompletamente for di e proseso ku semper tabata tei si disidí ku lo separá operashon di refineria for di Bullenbaai.
A yega momento pa Pisas bin dilanti i kontesta e karta dirigí na su persona i duna klaridat tokante di e situashon rondó di Bullenbaai den sentido ku e no ta separá e terminal for di refineria. Ketubai manera den e karta di 21 yüli 2022 e pregunta na Minister Presidènt ta, ku gobièrnu ta hasiendo su máksimo esfuerso pa por habri e refineria? Mirando ku lunanan ta pasando i no tin nada konkreto ta biniendo dilanti.