PISAS a reuni ku presidente i vise Presidente ELECTO di Colombia

Willemstad – Promé Minister sr. Gilmar Pisas ta riba un biahe di trabou na Colombia den representashon di Reino pa e inougurashon di sr. Gustavo Francisco Petro Urrego komo Presidente di Colombia, kual a tuma lugá dia 7 di ougùstùs 2022. Promé Minister sr. Pisas a hiba kombersashon ku Presidente elekto di Colombia sr. Gustavo Francisco Petro Urrego i Vise Presidente elekto di Colombia sra. Francia Elena Márquez Mina dia 6 di ougùstùs 2022. Promé Minister sr. Pisas a felisitá ambos dignitario den e último elekshon na Colombia i a deseá ambos tur kos bon durante di e kuater añanan benidero.
Durante di e kombersashon ku Vise Presidente electo sra. Francia Elena Márquez Mina a toka diferente tema manera tradishonal i fortifikashon di ekonomia entre Colombia i Kòrsou.
Riba tur e áreanan aki ta deseá di por traha huntu ku Kòrsou i Hulanda i alabes kompartí eksperensia ku otro.
Durante di e kombersashon ku Presidente electo sr. Gustavo Francisco Petro Urrego a amplia riba e diferente tratadonan ku Colombia tin den negoshason ku Hulanda MOU’s den ramo di Peskeria, Kultura, Edukashon Agrikultura, Duana i Turísmo.
A informá e Presidente electo tambe ku Kòrsou ta trahando riba un tratado komersial ku Colombia i ta finalisando e tratado di aviashon.
Presidente electo sr. Gustavo Francisco Petro Urrego a duna di konosé ku nan ke bai hasi mas uso di e relashonnan diplomatiko ku nan tin den Karibe pa por fortifiká San Andres, traha riba un sentro kultural i edukativo, duna mas atenshon na e parti di salubridat, integrá eksperensia ku e islanan den Karibe, krea oportunidat pa tin mas koperashon entre otro riba e áreanan di komersio i krusero.
Tambe e la elaborá riba kreamentu di un fondo ku por yuda esnan mas marginal ku por keda afektá pa e situashon di kambio di klima.
Di parti Colombia e la bisa ku lo trata di evitá kualkier avansé di e situashon aki i ta deseá di por traha huntu ku tur e islanan den Karibe.
Promé Minister sr. Pisas a splika Presidente elekto sr. Gustavo Francisco Petro Urrego ku di parti Kòrsou tin e deseo pa sigui amplia i konkretisá e tur tratado ku Colombia.