Internashonal
Petro a ofresé Trafikantenan: Pa no ekstraditá nan pa Merka basta nan negoshá ku hustisia Colombiano
BOGOTA – Gustavo Petro presidente di Colombia a ofresé narkotrafikantenan pa suspendé nan ekstraditashon pa Merka basta nan bin entrega i para ku nan aktividatnan.
E oferta aki a kai durante un konferensia di prensa ayera tardi den kompania di Pedro Sánchez presidente di Spaña ku ta na Colombia ne momentunan aki.
Un di e motibunan dikon Gustavo Petro a hasi e oferta aki den kompania di Pedro Sánchez ta debí trafikantenan ta invadiendo Spaña ku droga.
E mandatario Colombiano a splika ku su gobiernu lo duna e narkotrafikantenan e oportunidat pa nan mes bin entrega i den dado kaso esaki no pasa man largu di hustisia lo bin buska nan di un forma garantisá.
E meta di e situashon aki ta pa kaba ku violensia ku tin na Colombia konsiderando ku trafikashon droga a kuminsá bira un problema den nan pais mes.
Gustavo Petro ta referí ku e generashon di hóbennan no kier traha pero si kier gana hopi plaka i ta hòrta droga di otro ku ta trese gera entre kartelnan.
Colombia ta sigi komo e mayor produktor mundial di kokaina i Merka ta su prinsipal merkado.