Personal di SVB ke pa respetá su reglamentu di trabou

WILLEMSTAD- E problemanan na SVB ku ayera a kulminá den un wèlga i despues e desishon pa bai korte, a kuminsa for di januari 2021. Hefe di grupo di servisio na SVB, Jinesa Hato-Martina a splika ku for di januari 2021, gerensia di SVB a partisipa ku gobièrnu a pasa un lei di 12, 5 porshento ku ta konta tambe pa personal di SVB. Pero esaki no ta berdat, segun Jinesa Hato-Martina, pasobra a indika ku e lei a pasa ta pa amptenar i no pa e NVa nan di gobièrnu.Esaki ta e motibu dikon personal di SVB a protestá pero a keda trankil.
E presidente di grupo di servisio a sigi splika ku na augustus 2021 e grupo di servisio di SVB a kuminsa reuní ku gerensia riba e asuntu aki. ‘Na tres okashon a reuni pero kada bes a keda riba mesun lina i gerensia ta keda referi na gobièrnu’.
E grupo di Servisio a pidi pa sinta na mesa ku gobièrnu mes pa haña splikashon dikon ke tuma medida kontra di trahadonan di SVB.
E trahadonan ayera a drenta wèlga pa lucha pa nan derechi, Jinesa Hato a sigi remarká. ‘Nos no ta lucha pa nada otro, respeta nos arbeidsregelment’. Paso e medidanan ku gerensia di SVB ta tuma, tin konsekuensia pa e futuro penshun dje trahadónan, Jinesa Hato-Martina ta enfatisá.
E trahadonan di SVB tambe ta sinti ku kosto di bida a subi. Tin hende ku no por i tin kolega ku ta yuda otro, pero esei no por sigi pa semper. Ta pesei ta nesesario pa respetá e arbeidsregelment.

KONFUSO
Na kuminsamentu dje kombersashonnan, gerensia a bisa ku ta pasobra un minister a tuma medida pa no paga e prima pa Seguro básiko, pa tres luna, e fondonan di SVB a swak. Despues a bisa ku gobièrnu a indiká ku mester ekonomisá 23 mion florin na SVB. Jinesa Hato:” Pero e karta ku gerensia a manda 16 di mei pa personal ta menshoná ku mester ekonomisá 9.2 mion florin. Esaki ta konfuso pa e sindikato’. Jinesa-Hato ta keda insisti no por ekonomisá riba e trahadó òf e derechi di trahadó. Loke ku mester ekonomisa riba de segun Jinesa Hato-Martina, ta e waste den kompania. ‘Na 2007 a negosha e arbeidsregelment ku ta indiká ku ambos partido mester tene nan mes na e loke ku a negoshá’.