PENTEKÒSTER

Promé Lektura : Echonan di apòstelnan 2, 1-11
Salmo : Salmo 104, 1ab. 24ac. 29bc-31. 34
Di dos Lektura : 1 Korintionan 12, 3b-7. 12-13
Evangelio : Huan 20, 19-23

Un fiel a puntra su pastor: Kiko mi por hasi pa yega serka Dios?
I e pastor, na su turno, a puntr’é: Abo por hasi algu di manera ku solo ta sali riba kada mainta?
Indigná e fiel a kontest’é: Ta kiko ta sirbi , e ora ei, tantu predikashi i tantu insistensia den orashon?
P’asina bo ta lantá ora solo sali.
Awe, riba Fiesta di Pentekòster, Fiesta di Spiritu Santu, Fiesta di nasementu di Iglesia di Hesus, nos komunidat ta kombidá:

• no pa yega serka Dios, sino pa laga Dios yega serka nos.
• no pa manipulá Spiritu Santu sino pa ta lantá pa risibié.
• no pa inventá método nobo di orashon sino pa laga e Spiritu move nos i siña nos biba manera Hesus.
• no pa ser relashon públiko di Spiritu Santu sino pa ser hende ku ta manifestá e Spiritu.
Den e mundu akí den kua tin asina tantu iglesia manera bar i tur tipo di predikadó, tin hende ta puntra: ken ta garantisá mi ku mi ta den e berdadero iglesia?
E Palabra di Dios, na mil manera ta bisa nos ku Spiritu Santu ta e orígen i e vínkulo ku ta uni Hesus ku su iglesia.
Ora ku Hesus a nase na Bètlehèm ta pa obra di e Spiritu i ora iglesia nase na Herusalèm ta pa obra di e Spiritu,: “tur reuní na un lugá i tur tabata yen di Spiritu Santu.

Ora ku Hesus a kuminsá su ministerio ta bou di poder di Spiritu Santu na su boutismo. Ora ku Hesus a rekoré pais anunsiando Reino di Dios ta guiá pa e Spiritu.
Ora e apòstelnan abri nan mes pa e pekadornan, ta guiá pa poder di e Spiritu.
Historia di iglesia di dos mil aña pasá no ta historia di hende sino historia ku Spiritu Santu a skirbi pa medio di algun hòmber ku a laga e Spiritu guia nan.
E iglesia di Hesus, iglesia katóliko TA i lo Ta konstruí pa e mihó arkitekto, Spiritu Santu. E arkitekto ei mester di hopi kolaborador i esakinan ta nos, pero nos mester konosé e plan nan i obedesé e Arkitekto.
Nos no por konstruí na nos antoho. Lo e bira otro iglesia i di tal manera ta lanta hopi iglesia manera estilo di paña di bisti.
Pentekòster ta dia riba kua Spiritu Santu, manera e arkitekto di e Tata riba e dia ei, ta pone promé piedra di iglesia, e ta pone su kandela riba e apòstelnan pa nan aktua pa nan sali for di lugá será,