Pasaheronan di Conviasa: Ta pega na Argentina i ta protestando dilanti embahada

BUENOS AIRES – Djasabra durante oranan di trèmerdia un kantidat bastante grandi di pasaheronan venesolano ku mester a biaha di Buenos Aires/Caracas ku e kompania nashonal Conviasa a bai protesta na embahada venesolano.
E manifestantenan tabata bastante furioso ya ku lokual representantenan di Conviasa ta ofresé nan ta pa nan haña sèn di pasashi bek.
Lokual ku e manifestantenan aki ta interesá aden ta pa biaha ku Conviasa bek pa Caracas.
E problema aki ta unu serio ya ku outoridatnan na Aeropuerto Internashonal Ministro Pistarini Ezeiza na Buenos Aires no ta aseptá pa ningun avion prosedente for di Venezuela aterisá na Argentina.
Alexis Raúl Guerrera minister enkargá ku e kartera di Transporte i komunikashon na Argentina a rekomendá
e pasaheronan di Conviasa pa aseptá e plaka ku kier duna nan i bula ku un otro kompania di aviashon pa Caracas.
E motibu di e problema aki ta ku un avion di karga di Venezuela a transportá 5 Iraní ku dokumentashon pa Argentina via Aeropuerto Internashonal Ministro Pistarini Ezeiza na Buenos Aires.Na Argentina ta keda konsiderá lokual e venesolanonan aki a hasi komo un akto di terorismo.