Parokia di Westpunt a inougurá su bandera durante di selebrashon di fiesta Patronal

San Pedro ta patrono di Misa di Westpunt. Djárason 29 di yüni tabata fiesta di San Pedro. Tur kos tabata kla pa e selebrashon pero mal tempu i toke de keda a pone ku mester a posponé e selebrashon. Esaki a tuma lugá djadumingu último ei.
San Pedro ta wòrdu konsiderá pa Iglesia katóliko komo e baranka riba kual Iglesia ta konstruí. San Pedro tabata e disípulo ku tabata tin e skouder fuerte pa sigui ku e trabou di Kristu nos Señor. Esaki no tabata fásil i hasta tin momentu ku e a duda ku e mester a sigui. Pero Kristu a mustr’é ku e ta persona ideal pa kontinuá ku e Iglesia. Banda di e busto di San Pedro tin un gai i esaki ta pa rekordá nos tur, ku nos tambe ta hende i komo hende nos tur por faya. San Pedro a nenga Kristu tres biaha. Na e di tres biaha un gai a kanta i San Pedro a kòrda lokual Kristu a bisé: lo bo nenga ku bo konosé mi tres biaha i na e di tres biaha un gai lo kanta. Komo hende nos tur por faya pa sigur ku nos ta ku esei lo no sosodé.
Meskos nos tambe, komo siguidó di Kristu mester tin nos skouder fuerte pa karga tur e responsabilidatnan ku nos tin. Esaki ta konta pa tur kos ku nos ta hasi. Nos no mester hui pa nos responsabilidat. Karga esaki ku dignidat i purba pa no faya den ehersisio di esaki.
Pa hopi tempu Pastor Baak tabata kana ku e idea pa bini ku un bandera pa Parokia di Westpunt. Algu ku ta identifiká e hendenan di Westpunt. Pa e motibu ei, e a diseñá un bunita bandera ku lo ta símbolo pa henter e bario di Westpunt. Probechando di e fiesta Patronal, e bandera aki a wòrdu inougurá i trese den misa pa e dos baluartenan di Westpunt. Despues di a drenta den misa bou di tono di un kantika special, Pastor a bendishoná e bandera i for di awor Parokia di Westpunt komo promé misa na Kòrsou tin su mes bandera. Personanan ku ta interesá pa kumpra e bandera aki por tuma kontakto ku Pastor I bestèl nan bandera. Na okashon nan special e bandera aki por wòrdu usa.
Pa kasualidat nos famoso Tania Kross tambe tabata den misa i Pastor kasi no kier a puntra pero a puntra tòg si Tania por a kanta un Ave Maria. Gustosamente Tania a hasi esaki. Masha bunita esaki a zona. Despues ku Tania a kaba, e a haña un fuerte aplouso.
Despues di misa tur hende por a pasa tuma un kos di kome i kos di bebe. Tambe Grupo SanMango tabata presente ku a entretené tur hende pafó di misa.
Un pabien na Pastor Baak i henter e komishon ku a hasi un gran trabou. Riba e potrètnan por mira kon kos a kana na misa di Westpunt djadumingu ku a pasa.