Parokia di Soto a selebrá di un manera grandi e fiesta di San Antonie

San Antonie na Kòrsou ta un santu ku tin masha hopi devoto i ta e santu ku mas katólikonan ta akudí na dje pa tur sorto di nesesidatnan ku nan tin. Ora ku San Antonie no kumpli nan ta rabia i bira San Antonie su kara pa muraya pa straf e.
Den pasado dia 13 di yüni tabata tin diferente persona ku tabata tene “lele Toni” na nan kas, un aktividat ku de fakto tabata un fiesta grandi pa gradisié Papa Toni pa tur e kosnan ku e a hasi pa su fielnan.

Defuntu Shon Mosa mama di Chati Constancia, tabata konosí pa e persona ku tabata tin e selebrashon di Lele Toni.
San Antonie ta patrono di misa di Soto. Ora ku Pastor tabata preokupá kon ta hasi pa akapará tur e hendenan ku sigur lo a bini misa, ta manera ku San Antonie mes a sòru pa e solushon dor ku entrante ayera Misanan Katóliko konforme dekreto di nos Obispu a habri i e restrikshon di 50 persona a kaduká.
Ta pa e motibu ei misa tabata full i e selebrashon a kuminsá ku un proseshon for di Don Sarto school pa misa di Soto ku San Antonie riba un trùk i Obispu i fielnan kanando i resando. E estatua di San Antonie tabata hopi bunita dòrna i e kor di Soto a animá e misa di un manera sublime. Huntu ku Obispu tabata tin dos diakono i 3 saserdote mas.

Nos futuro Promé Minister sr. Pik Pisas tabata sinta “eerste rij eerste bank”huntu ku Minister demisionario Hensley Koeiman. Ta bon pa opservá ku Sr. Pisas ta di parokia di Soto.
Nos Obispu den un bunita predikashi a elaborá over di e parabolnan ku nos a tende den evangelio. E simia ku nos ta planta a kore komo un liña kòrá den e predikashi di nos Obispu. E simia ku nos ta planta ta algu hopi chikitu kual ku tèmpo ta konbertí den un palu grandi. Pero nos tin ku tene kuenta ku e simia mester haña su chèns pa krese, i nos no mester kere ku esaki ta krese di un dia pa otro. Meskos ku un baby tin mester di 9 luna Promé ku e nase, asina e simia tambe mester su tèmpo. Tambe Monseñor a papia over di San Antonie. E tabata un hòmber studia i a drenta den e órden di Fransiskano. Ora e a drenta nan a mand’e bai traha den kushina kual obediente mente e a hasi, apesar di su estudio avansá den teologia. Dado momentu un saserdote mester a tene un predikashi i e a hañ’e stroba. E ora ei San Antonie a ofresé pa hasi esaki. E a prediká a hasi asina tantu impakto, ku for di e dia ei, e a bira hopi konosí na Boloña i rònt Italia.

Manera semper na tur misa di San Antonie e pan i kosnan di boka dushi no tabata falta i despues ku Obispu a bendishoná esakinan tur hende por a stèl òp pafó di misa pa parti esaki.
Un selebrashon tur afó i un pabien na Pastor huntu ku su diakono i e komishon na enkargo di e selebrashon di San Antonie.