Parlamentario mr. dr. Ryçond Santos do Nascimento Ta ken ta gaña: MEP of Diensthoofd di Censo?

ORANJESTAD-Partido MEP a adopta un rol di victima despues cu el a manda preguntanan na señora Evelyn Wever-Croes. Den su comunicado di dia 5 di november ultimo MEP ta nenga di hiba un politica madura y reconoce e hecho cu Prome Minister Wever-Croes a pone integridad di Censo na peliger ora cu señora Wever-Croes a scoge pa pone un conseho pa garantiza integridad un banda, segun Ryçond Santos do Nascimento di fraccion di AVP.

Hefe di Censo, señora Sharine Luydens, a conseha pa no duna un BVVD (un verlof excepcional) na un empleado pa motibo cu mester di un cantidad minimo di empleado pa garantisa integridad di Censo. Esaki señora Luydens a raporta. Dicon MEP ta bisa awor cu e persona a baha cu VUT en bes cu ta trata di un BVVD? Ta ken ta gaña: MEP of Diensthoofd di Censo? Ken tin un falta di integridad?

Sharine Luydens a malinforma Prome Minister of MEP ta bezig di malinforma pueblo?
Un manager cu ta tuma integridad na serio ta tuma cierto medida pa fraude ni hortamento (verduistering) por tuma lugar. E medidanan aki ta encera autorizacion pa haci cierto transaccion, documento y registro adecua, control independiente riba performance di empleadonan y separacion di funcionnan. Un ehempel di e separacion di funcion ta ora cu ta laga un empleado ricibi pago den forma di placa efectivo, ta laga un otro empleado registra e recibonan di e placa cu a drenta y un otro empleado ta deposita e placa na banco.
Si un manager no ta haci su trabao manera mester ta y ta laga un solo persona traha cu placa, registra placa e deposita placa na banco, e mes ta pidi pa problema. Esey simplemente ta mal maneho. Den e caso di Censo, Minister-President tabata sa cu si e duna e BVVD e lo ta creando un riesgo di integridad.

E mal maneho a costa mas cu 60.000 florin sin conta e gastonan di proceso hudicial, e raport di CAD y otro gastonan inecesario, si e maneho ta integro.

P’esey ta un falta di seriedad completo di parti di MEP pa purba spin e storia y tira tur culpa riba e empleado cu a comete fraude. E empleado ta responsabel pa su actonan, pero e no ta responsabel pa mal maneho di controlnan di integridad. E pregunta ta keda cuanto miyones e mal maneho ta costa Aruba? Nos sa cu tabatin fraude di 800.000 florin na Departamento di Impuesto. Nos sa cu nombramentonan politico y otro violacionnan di integridad ta na ordo di dia den hopi di nos entidadnan publico y semi-publico y pa colmo MEP ta apoya un conflicto di interes di mas cu 3 miyon florin cu Minister Endy Croes tin como Minister di Deporte. Aparentemente MEP no kier madura, ni hiba un maneho responsabel.

MEP ta pretende cu Prome Minister Evelyn Wever-Croes a haci su trabao, pasobra el a tuma accion despues cu e baca a hoga caba. Locual MEP kier tapa ta cu e sa cu medidanan disciplinario manera schorsing di e empleado y kita e empleado for di trabou ta medidanan represivo cu mester tey como ultimo remedi.

MEP sa cu goberna na un forma responsabel y madura ta rekeri medidanan preventivo y vision.

Sinembargo MEP ta opta pa no ta transparente y pa bin cu atake personal. E pregunta ta kico ta haci MEP asina tanto dolor cu e mester bin cu atake personal? Unda e integridad y profesionalismo di MEP a keda, Rycond Santos do Nascimento a sigui cuestiona.