Parlamentario Giselle Mc William Gobièrnu mester (re) konsiderá e desishon pa ku kaha di Ontvanger ..Den e momentonan aki no por ta skohe pa kita trahadó

WILLEMSTAD. Ultimo nos a tuma nota di e desishon di Minister pa terminá e kontrat laboral ku algun persona ku ta traha na e kahanan di kobransa di Ontvanger. Frakshon di MAN ta lamento e desishon aki mirando ku ainda tin e nesesidat pa tin e kahanan aki pa asina nos pueblo por hasi pagonan di impuesto. Nos ta di akuerdo ku mester yega na grado kaminda pagonan di impuesto ta tuma luga di forma online. Pero te ne momento aki nos no a yega einan ainda.
Na 2016 Gobièrnu a tuma mesun desishon pa stòp servisio di kaha i riba reklamo di Defensor di Pueblo (ombudsman) a drai bèk esaki mirando ku plaka kèsh ta un medio legal pa hasi pago pero tambe e nesesidat ku tin bou di komunidat pa akudi na servisio di Ontvanger pa paga impuesto i otro servisionan.
E desishon aki a krea tambe doló den kasnan di e trahadónan aki mirando ku nan a pèrdè entrada. Mirando e lema di gobiernu kual ta “ku pueblo” frakshon di MAN ta kere ku esaki no ta kuadra ku e lema.
Minister di Finansa a indiká na komienso di su periodo komo minister ku ta un abusu a tuma lugá basta tempu dor di laga e trahadónan traha pa basta tempu via di uitzendbureau.
E Minister mes a indiká ku e trahadónan aki mester ta den servisio di Gobiernu mirando ku tin nesesidat di personal na servisio di impuesto.
Frakshon di MAN ta konsiente ku nos mester yega na hasi uso di sistemanan moderno pa hasi pago. Pero esaki ta proseso ku mester kana pa yega, tambe mester atende pa algun grupo den nos komunidat tambe por tin e akseso aki.
Frakshon di MAN ta konsiente i tin kompronde e doló ku e desishon aki tin pa e trahadonan pero tambe e pueblo ku ainda ta hasi uso di kahanan di Ontvanger.