Parlamentario Emmanuel: COHO tabata pèrdèmentu di tempu total

PHILIPSBURG. IPKO a bin i IPKO bai, parlamentarionan di Ulanda i e tres paisnan di Reino den Karibe a chèlèlè nan barika yen pero resultado konkreto no tabatin.
I esei pa e miembro independiente di parlamento di Sint Maarten ta nifika ku e tabata un pèrdèmentu di tempu total.
Es ku e partnernan den Reino ta mes aleu di yega na un konsenso ku promé ku e konsultanan a start riba COHO.
E uniko parlamentario di St. Maarten ku tabata kontra e plan for di su prinsipio ta konvensi ku otro parlamentarionan inkluso e ulandesnan,a kuminsa realisa ku COHO lo no funshona riba nos islanan.
Pa kolmo Sint Maarten komo pais anfitrion di IPKO te na final no por a presenta un posishon ofisial loke ta proba ku tur ehersisio ku tabatin e aña ku a pasa tabata pòrnada.
Diferente frakshon a asisti na IPKO ku diferente posishon, kuenta di hada i metanan imposibel.
Komo parlamentarionan eligi nan a bolbe demostra ku nan ta kompletamente aheno na realidat dje tera ku nos ta pisa.
For di 2020 e parlamentario a bin ta proponé parlamento di Sint Maarten pa uni i traha riba reformanan realista pa e pais pa logra rekuperashon ekonomiko.
Ningun hende a ninga ku e pais mester di reforma pero amtenar profeshonalnan ya kaba tabatin plan den nan kabes kiko e reformanan aki mester ta.
Siendo ku Ulanda por a simplemente fia nan poko eksperto pa asisti tur isla pa bira mas resistente despues di e krisis.
Na lugá di esei gobiernu ulandes ta insisti pa sigi un ruta ku ta violá derecho i leinan di Sint Maarten.
I gobiernu ta djis sigi guli i traga manda abou ku ta tradusi su mes den tempu pèrdí. Mientras tantu Aruba i Korsou ta avansando pa eliminá e retenshon di 12.5% riba nan salario pero nada Sint Maarten nada di esaki.
En kambio tur hende kier a pasa pa Einstein ku teoria nan sientifiko pa hustifika un COHO ku ta simplemente malu pe pais.
Ni e parlamentarionan ulandes no ta konvensi di COHO i gobiernu di Sint Maarten a pèrdè tempu riba COHO, gaña i engañá na lugá di a traha riba union i konsenso basá riba outonomia i leinan.