Parlamentario Doran ke sa: Ken a duna pèrmit pa banda musikal toka fiesta den Baoase

WILLEMSTAD. Den un karta ku e parlamentario di MFK, Gilbert Doran a manda pa Minister di Hustisia señor Gilmar Pisas, e ta kuestioná e aspektonan rondó di un fiesta ku banda srtañero den hotel Baoase resientemente.
E ta splika ku resientemente, a surgi un kontroversia, unda ta impliká e pèrmit pa ku organisashon di aktividatnan ku konstelashon di banda, kual for di dia 19 di ougùstùs 2021 no tabata pèrmití mas.
Ta trata aki di un fiesta o aktividat organisá na e prestigioso hotèl Baoase, unda tabatin presentashon di un agrupashon musikal di eksterior.
Pueblo di Kòrsou, i sigur tambe músikonan ta sumamente indigná ku e aktividat aki, pa motibu ku ta prohibí nos di tin selebrashonnan ku agrupashonnan musikal, pero ta pèrmití otronan si pa hasi esaki. Pues ta di sumo importansia pa midi ku un midí i no laga sinti ku sierto grupitonan tin privilegio riba otronan.
Ta di añadí tambe, ku e aktividat aki a tuma lugá te ku 12or di anochi. Pues por asumí tambe ku e invitadonan di e aktividat en kuestion lo mester a salta e reglanan vigente di toke de keda, mirando ku nan lo mester a trafiká riba kareteranan di Kòrsou mas lat ku e orario stipulá.
Pe motibunan aki ela manda puntra minister di Hustisia Pisas ken a duna e pèrmitnan nesesario pa e agrupashon musikal aki a drenta Kòrsou i ken a duna e pèrmitnan nesesario pa e organisadónan por a dal bai ku e dicho aktividat.
Kon por ta ku un ‘Hoofd van Dienst tambe tabata partisipe den e aktividat aki i te kon leu e liña pa midi kuné ta yega ora ta trata di persona i/o lugánan di élite. Tambe Doran ke sa dikon ta otorgá pèrmitnan na agrupashon musikal di eksterior, mientras ta para firme riba esaki pa ku agrupashonnan lokal.
Sperando riba un kontesta pronto riba e preguntanan formulá pa Minister di Hustisia, pa evitá malkontentunan innesesario den nos komunidat .