Parlamentario Amerigo Thodé: Ainda no a subi sèn di kuminda pa detenidonan

WILLEMSTAD – Frakshon di MFK tin informashon ku un biaha mas den e último rapòrt di CPT, ta bolbe mustra riba e defisiensianan na SDKK i tambe nan ta bolbe hala atenshon den e parti di kuminda kaminda ku te ainda esaki no ta kanando na nan satisfakshon. Tambe Frakshon di MFK ta reklamá ku den Parlamento durante di presupuesto na kuminsamentu di desèmber 2021 a puntra e Minister konserní tokante di e sèn di kantina ku esaki mester a subi di 500 florin pa 750, kaminda minister a indiká i konfirmá ku esaki tabata reglá kaba stuk nr. 2021032794 i ku mester a ehekutá e desishon aki te awe nada, nada no a keda konkretisá ni regla. Na febrüari di e aña aki ora e direktor di SDKK a presentá den Parlamento pa un reunion den Komishon Sentral, e mesun preguntanan a keda hasi, pero di solushon ketu bai nada

Primeramente den e kaso aki ta tarea di gobièrnu (Direktor) pa respetá dignidat di e detenidonan di SDKK, i prepará e klientenan pa nan regreso bek den komunidat. No ta paso e presu a kometé algu kastigabel i ku e a keda sentenshá pa hues, Gobièrnu na su turno ku e situashon inhumano aki ta bolbe kastigánan dor di laganan den un ambiente ku no ta kumpli ku lei regla i prosedura pero tampoko ta kumpli ku e mínimo di higiena ku ta rekurí na un instituto manera SDDK, o ta laga nan pa nan kuenta den inseguridat, kaminda por bisa ku Gobièrnu na su turno tambe ta kastigánan di e forma aki un biaha mas. Esaki ta nifiká ku ta dos bes ta kastigá e klientenan di SDKK.
Na di dos lugá Minister ta na altura ku di 5 di mei 2021 un Miembro di Parlamento tambe a manda un karta pa e minister di e temporada ei ku hopi di e problemanan ku e tambe a siñalá den SDKK, Minister por pone Parlamento kiko a keda regla for di e temporada ei.

PREGUNTANAN

Frakshon di MFK hasiendo uso di e derecho di hasi pregunta ankrá den artíkulo 96 di Reglamento di Òrdu i tambe artíkulo 57 di nos Areglo di estado, na nòmber di nos frakshon ta hasi minister Hato entre otro e siguiente preguntanan.

1. Minister ta na altura ku klientenan di SDKK tin hopi reklamo riba: e kalidat di kuminda, problemátiko ku koriente, problema di higiena, problema di plaga di muskita, raton i djaka?
2. Minister ta na altura ku klientenan di SDKK mester usa deken i laken pa tapa solo ku ta drenta atardi den nan sèlnan?
3. Minister ta na altura ku tin problema ku instalashon eléktriko den SDKK?
4. Minister ta na altura di riolering pa flush wc i tambe flush di riolering di kushina i bañonan?
5. For aña 2019 GGD a “keur af” e kushina di SDKK pa motibu di higiena i ta sèn falta pa drecha e kushina aki pa e ta operashonal?.
6. Dikon no a presupuestá e sèn pa e kushina aki di manera ku awor e ta den funshon sirbiendo kuminda na tur e klientenan manera preskribí den lei.
7. Ta bèrdat ku no ta sirbi e klientenan den SDKK kuminda ku ta :
a. Konforme e menú ku dietista ta traha,
b. kuminda saludabel
c. Kuminda di kalidat
d. Kuminda kayente manera debe ser
e. Kuminda na tempu
f. Variedat
g. Konforme reglanan internashonal pa e tipo di instituto asinaki
8. Ta ken ta e persona ku ta kontrolá e kuminda na SDKK?
9. Ta kohe “monster” tur dia di e kuminda ku ta keda sirbi pa wak si esaki ta kumpli ku normanan manera un instituto penitensario
10. Gerensha di SDKK por tin e rapòrtnan di kalidat, variedat, saludabel fresku di e kuminda ku tur dia ta keda sirbi na SDKK?