Papa vakuna ta salba bidanan, no pa kaprichonan pa e “dosis mas famoso”

Francisco ta ripití su konvikshon tokante e importansia di un kampaña mundial di vakunashon den e mensahe introduktorio di e buki “Mas ayá di e tormenta”, un entrevista ku e periodista Fabio Marchese Ragona yanüari di e aña aki. Papa ta gradisí e sientífikonan i e médikonan i ta invitá hendenan pa “haña trankilidat tras di e skuridat di e enfermedat”.
Michele Raviart – Siudat di Vatikano

“Danki na e vakuna poko poko nos ta bolbiendo na mira e lus”, i nos ta saliendo di e “ pesadia mahos” aki di e pandemia. Pero awor e berdadero reto “ta hasi esfuerso p’asina ku tur persona di mundu tin e mesun akseso na e vakuna, p’asina ku no tin “kapricho” den elekshon di e dosis mas famoso i, prinsipalmente, ku e ta grátis pa esun ku mester d dje i no algu di kua lo por saka un benefisio fásil”. E vakuna, en bèrdat, “por salba hopi bida, no laga nos lubidá esaki i no laga nos lubidá loke historia a siña nos ku otro enfermedatnan malu di pasado”.

“Mas ayá di e tormenta”
Asina papa ta afirmá den e mensahe introduktorio di e buki “Mas ayá di e tormenta. Reflekshonnan pa un tempu nobo despues di e pandemia”, publiká djaweps ei pa Rizzoli i ku ta kontené e entrevista di Papa ku e periodista Fabio Marchese Ragona, emití den e kadena italiano Canale 5, na yanüari die aña aki, asina manera diskursonan di presidente di e Parlamento Europeo, David Sassoli, di e Alto Komisionado di Nashonnan Uní pa Refugiadonan, Filippo Grandi, di e fundador di e Komunidat di Sant’Egidio, Andrea Riccardi, di e direktor di sine Giuseppe Tornatore, di e eskritor Edith Bruck i di e kantante Noa.

Speransa nunka ta defroudá
Purba na superá e tormenta di e pandemia, Papa ta splika, ta nifiká bolbe na e speransa di “haña e pas tras di e skuridat di e enfermedat”; manera Abraham, “ku den un momento di deskonfiansa, na lugá di pidi e yu primintí ku no a yega, a dirigí su mes na Dios p’asina ku E lo yud’é pa sigui sperando”. No tin nada mas bunita: e orashon pa speransa pasobra speransa nunka ta defroudá”.

E agradesimentu di Papa tambe ta dirigí “na e sientífikonan ku durante tantu lunanan a studia e kombinashon adekuá pa optené vakunanan efikas, pero prinsipalmente tur esnan ku tabata serka di nos durante e fase mas kritiko, médikonan, enfermeronan, boluntarionan i hopi otro figuranan ku ta permanesé den sombra i no t Sali na televishon òf den e portada di korantnan”.
G20: 40% di personanan vakuná na fin di aña
Den liña ku algun di e kuestionnan plantia pa e Pontífise den su mensahe introduktorio i den e entrevista tin e aprobashon di e asina yamá Pakto di Roma di parti di e ministronan di Sanidat di e paisnan di G20.
E ophetivo ta hiba e vakunashon anti Covid na 40% di e poblashon mundial pa fin di aña, ku spesial atenshon na paisnan mas frágil. Lo destiná 2.000 mion di dòler pa hiba e vakuna na tur parti i permití produkshon outónomo di vakuna den otro zonanan di mundu.