Papa ta animá na imitá e orashon i balentia di San Hosé pa konfrontá difikultatnan

Pa Mercedes de la Torre | ACI Prensa

Den e Oudiensia General di djarason 26 di yanüari, Papa Francisco a invitá na superá miedu imitando e orashon i balentia di San Hosé ku a rekonosé e bos di Dios i a konfrontá difikultatnan sin sukumbí.
“Den bida nos ta eksperimentá peligernan ku ta menasá nos eksistensia òf di esnan ku nos ta stima. Den e situashonnan akí, resa ke men skucha e bos di esun ku por laga nase den nos e mesun balentia di Hoséì, pa konfrontá difikultatnan sin sukumbí”, e Tata Santu a indiká.
Den e liña akí, Papa a rekonosé ku “miedu tambe ta forma parti di bida i esaki tambe mester di nos orashon” i a añadí ku “Dios no ta primintí nos ku nunka nos lo tin miedu, sino ku, ku su yudansa, esaki lo no ta e kriterio di nos desishonnan”.
“Hosé a sinti miedu, pero Dios ta gui’é tambe atraves di djE. Poder di orashon ta laga lus drenta den situashonnan di skuridat”, el a señalá.
Na ora di dediká su katisashi na e “figura di San Hoséì komo hòmber ku ta soña” e Tata Santu a rekordá ku “den Beibel, komo den kulturanan di e pueblonan antiguo, tabata konsiderá soñonan komo un medio atraves di kua Dios tabata revelá su mes”.
Di e moda akí, Papa a deskribí ku “soño ta simbolisá bida spiritual di kada un di nos, e espasio interior akí, ku kada un ta yamá na kultivá i protehá, kaminda Dios ta manifestá su mes i hopi be ta papia ku nos”.
Sin embargo, e Tata Santu a atvertí nos ku “denter di kada un di nos no tin únikamente e bos di Dios, sino ku tin hopi otro bosnan, manera por ehemplo, “bosnan di nos miedu, di e eksperensianan pasá, bosnan di speransa; i tambe tin bos di e maligno ku ke gaña nos i konfundí nos”.
Ta pesei, Papa a destaká e importansia di “logra rekonosé e bos di Dios mei mei di otro bosnan” i a suprayá e testimonio di San Hoséì ku “ ta demostrá ku di sa na kultivá e silensio nesesario i, prinsipalmente, tuma e desishonnan hustu dilanti di e Palabra ku Señor ta dirigí na dje interiormente”.
Den e sentido akí, e Tata santu a reflekshoná riba e kuater soñonan di San Hosé kontá den e Evangelio ku ta yuda nos na “komprendé kon pone nos mes dilanti e revelashon di Dios”.
“Hopi be bida ta pone nos dilanti di situashonnan ku nos no ta komprendé i ta parse ku no tin solushon. Resa, den e momentonan akí, ta nifiká laga ku Señor ta indiká nos kua ta e kos hustu pa hasi. En bèrdat, mashá hopi be ta orashon ku ta duna nos e instinto di e salida, kon resolvé e situashon akí”, el a afirmá.
Despues, Papa a splika ku “Señor nunka ta permití un problema sin duna nos tambe e yudansa nesesario pa konfront’é” i a agregá improvisando ku Dios “no ta tira nos den fòrnu, E no ta tira nos bou di bestianan. No. Ora Señor ta laga nos mira un problema semper e ta duna nos e instinto, e yudansa, su presensia pa sali, pa resolv’é”.
“Den e momento akí mi ta pensa riba e hopi personanan ku ta aplastá pa e peso di bida i ya no ta logra ni spera ni resa. Ku San Hoséì por yuda nan na habri nan mes na e diálogo ku Dios, pa bolbe haña lus, forsa i pas”, Papa a resa i ku tambe a rekordá e mayornan ku ta sufri pa sufrimentunan di e yunan.
Promé di konkluí su katisashi den italiano, e Tata Santu a suprayá ku San Hosé “tabata resa, traha i stima” i, pa esaki, “semper el a risibí lo nesesario pa konfrontá e pruebanan di bida” pa kua e ta kurashá nos pa konfia na dje i su interseshon ku e orashon akí:
“San Hoséì, abo ta e hòmber ku ta soña,
siña nos na rekuperá e bida spiritual
komo e lugá interior den kua Dios ta manifestá su mes i ta salba nos.
Kita for di nos e pensamentu di ku resa ta inútil;
yuda kada un di nos pa korespondé na loke Señor ta indiká nos. Ku nos rasonamentunan ta ser iluminá pa e lus di e Spiritu, nos kurason kurashá pa Su forsa i nos miedu salbá pa Su miserikòrdia. Amèn”.