Papa Francisco ta ekspresá su mes tokante matrimonio katóliko i unionnan di e mesun sekso

Redakshon ACI Prensa

Djarason 15 di sèptèmber durante e konferensia di prensa den e buelo di regreso pa Roma, Papa Francisco a afirmá ku matrimonio ta un sakramento entre un hòmber i un muhé i ku Iglesia no tin poder pa kambi’é.
E Pontífise a bisa e palabranan aki den e buelo di regreso di su biahe pa Budapest (Hungria) i Eslovaquia, ku el a realisá di 12 pa 15 di sèptèmber.
Durante e konferensia di prensa, e periodista italiano Stefano Maria Paci, di Sky Tg 24, a rekordá ku den su enkuentronan ku outoridatnan hungaro i ku e hóbennan eslovako, Papa a papia tokante e importansia di famia, sin embargo, el a señalá, djamars 14 di sèptèmber e Parlamento Europeo a emití un resolushon ku ta pidi e paisnan miembro pa rekonosé matrimonionan homoseksual.
Den su kontesta, Papa Francisco a bisa ku “mi a papia kla tokante esaki: Matrimonio ta un sakramento. Matrimonio ta un sakramento i Iglesia no tin e poder pa kambia sakramentonan, asina manera Señor a instituí nan, no?”.
Despues el a bisa ku “esakinan ta leinan ku ta trata na yuda e situashon di hopi persona ku orientashon seksual diferente, i ta importante ku ta yuda e personanan aki pero sin imponé kosnan ku, pa nan naturalesa, no ta bai den Iglesia”.
“Pero si nan ke hiba un bida huntu den pareha homoseksual, Estadonan tin e posibilidat di apoyá nan sivilmente, di duna nan seguridat di herensia, salubridat. Fransesnan tin un lei pa esaki no únikamente pa homoseksualnan, sino pa tur persona ku mester asosiá nan mes”, el a añadí.
Francisco a indiká ku “matrimonio ta matrimonio. Esaki no ke men kondená personanan ku ta asina, no por fabor, nan ta nos rumannan i nos mester kompañá nan. Pero, matrimonio komo sakramento ta kla , e ta kla”.
“Pero ku ta eksistí leinan sivil ku… Por ehemplo, tres biuda ke asosiá nan mes, den un lei pa por tin servisio di salubridat, pa por tin e herensia entre nan, ta hasi e kosnan aki, mi ta kere ku ta e PAC (Pakto sivil di solidaridat) franses, e lei akí no tin nada di aber ku parehanan homoseksual, ku parehanan homoseksual por us’é? Nan por us’é. Pero Matrimonio komo sakramento ta hòmber –muhé “, el a afirmá.
“Tin be, nan ta krea konfushon ku loke mi a bisa, tur hende ta igual, mester respetá tur hende, Señor ta bon i lo salba tur hende, no bisa esaki na bos altu, Señor ke salbashon pa tur hende, pero, por fabor, no laga Iglesia nenga su bèrdat”, el a insistí.
Papa Francisco a bisa ku “hopi persona ku orientashon homoseksual ta aserká e sakramento di Penitensia, nan ta aserká pa pidi konseho na saserdotenan, Iglesia ta yuda nan pa bai padilanti den nan bida, pero e sakramento di Matrimonio ta bai”.