Papa Francisco preokupá ku e detenshon di Obispu i pastornan na Nicaragua

ROMA – Papa Francisco a ekspresá ayera djadumingu durante su misa na Vatikano ku e ta preokupá ku e situashon ku tin na Nicaragua pa lokual ta detenshon di un Obispu i sinku pastor.
Lokual ku por a komprondé di Papa Fransisco ta ku ela pidi pa bini “un diálogo habri i sinsero” pa asina por yega na un solushon pasífiko i liberá e Obispu i sinku pastornan.
E motibu dikon Papa Fransisco ta preokupá ta ku for di djabièrnè último presidente Daniel Ortega a laga detené Rolando Álvarez Obispu di Matagalpa i no ta laga ningun hende drenta den kontakto kuné.
Tin indikashon ku agentenan federal a haña òrdu di Daniel Ortega pa detené Obispu Rolando Álvarez ku durante un deklarashon na televishon ela kondena e forma kon e régimen ta abusando kontra serbidornan di iglesia katóliko.
Rolando Álvarez obispu di e Diósesis de Matagalpa ta alabes atministrador apostóliko di e Diósesis de Estelí.
Tin informashon ku Obispu Rolando Álvarez no a keda enkarselá huntu ku e sinku otro pastornan.
Francisco Díaz direktor di kuerpo polisial na Nicaragua i alabes suegro di presidente Daniel Ortega a konfirmá ku ela haña òrdu pa detené obispu Rolando Álvarez i ku wes lo tin ku bai sigi atendé ku su kaso.
Papa Fransisco a bisa ku lokual ta pasando na Nicaragua ta nunka bisto i ta spera ku pronto lo por laga e sirbidónan di iglesia katóliko den libertat.