Papa Francisco: Kuantu eror nan a kometé den historia di evangelisashon!

Papa Francisco a lamentá algun eror ku nan a kometé den historia di Evangelisashon durante su katisashi semanal ku el a pronunsiá den e Oudiensia General di djarason 13 di òktober.
“Kuantu eror nan a kometé den historia di evangelisashon keriendo di imponé un solo modelo kultural! Uniformidat”, el a bisa.
“I esaki, uniformidat komo regla di bida no ta kristian, unidat si, unidat si, uniformidat no”, Papa a atvertí.
Den e liña akí, e Tata Santu a indiká ku “tin be, nan no a renunsiá ni sikiera na violensia p’asina kue propio punto di bista prevalesé”.
Papa Francisco a agregá: “laga nos pensa riba gueranan… di e manera akí, a priva Iglesia di e rikesa di hopi ekspreshon lokal ku ta trese kuné e tradishon kultural di poblashonnan kompleto. Pero esaki ta eksaktamente lo kontrario di e libertat kristian!”.
“Por ehemplo, ta bini na mi mente ora a afirmá ku e formanan di hasi apostolado den China ku Pader Ricci, den India ku Pader De Nobili. [Algun a bisa]: ‘No, esaki no ta kristian!’. Si, e ta kristian, e ta den e kultura di e pueblo”, Papa a señalá.
E Tata Santu a referí na e kuestion akí durante su reflekshon tokante libertat kristian basá den e karta di San Pablo na galatanan.
Asina Papa a suprayá ku “e pensamentu di Pablo ta bolbe mustra di un profundidat inspirá” pasobra “aseptá fe ta trese kuné renunsiá no di e kurason di kultura i tradishonnan, sino únikamente di loke por opstakulisá e novedat i puresa di e Evangelio”.
“E libertat optené di morto i resurekshon di Señor no ta drenta den konflikto ku kulturanan, ku tradishonnan ku nos a risibí, sino ku mas bien e ta introdusí den nan un libertat nobo, un novedat d liberashon, esun di e Evangelio”, el a deskribí.
Despues, e Tata santu a señalá ku “e liberashon optené ku Boutismo, en bèrdat, ta permití nos atkirí e pleno dignidat di yunan di Dios”.
Di e forma akí, el a indiká, “miéntras nos ta keda bon pegá den nos raisnan kultura;, na mesun tempu nos ta habri nos mes na e universalismo di fe ku ta drenta den tur kultura, ta rekonosé e simianan di bèrdat presente i ta desaroyá nan na plenitut e bon ku tin den nan”.
“Aseptá ku nos a keda liberá dor di Kristu, su pashon, su morto, su resurekshon, ta akseptá di hiba e plenitut tambe den diverso tradishonnan di kada pueblo, e berdadero plenitut”, el a añadí.
Di e moda akí, Papa Francisco a splika ku “den e yamada na libertat nos ta deskubrí e berdadero sentido di inkulturashon di e Evangelio”.
Ademas, el a invitá na reflekshoná “kua ta e berdadero sentido di inkulturashon di e Evangelio? Ku e Evangelio ta tuma e kultura den kua e komunidat kristian ta biba i ta papa di Kristu ku e kultura akí”.
“I kua ta e berdadero sentido di e inkulturashon akí? E ta ser kapas pa anunsiá e Bon Notisia di Kristu Salbador respetando loke ta bon i berdadero ku ta eksistí den kulturanan”.
“E no ta algu fásil! Hopi ta e tentashonnan di ke imponé e propio modelo di bida komo si fuera esun mas evolushoná i esun mas atraktivo”, Papa a indiká.