Papa Francisco: Hipokresia den Iglesia ta “partikularmente horibel”

Pa Miguel Pérez Pichel | ACI Prensa

Papa Francisco a atvertí kristiannan kontra hipokresia denter di Iglesia, un aktitut ku el a konsiderá “partikularmente horibel”. “Pa desgrasia, hipokresia ta eksistí den Iglesia i tin hopi kristian i hopi ministronan hipókrita”, el a lamentá.
Pa splika su enseñansa, e Tata santu a komentá durante e Oudiensia General di djarason 25 di ougùstùs den Vatikano, e Karta di San Pablo na galatanan, teksto ku ta sentrando su katisashi di último simannan.
Den e fragmento analisá awe, “Pablo a menshoná un korekshon ku el a hasi na Cefas, ke men, na Pedro, dilanti e komunidat di Antioquía”.
Pablo ta reprochá Pedro pa su aktitut pasobra, “pa evitá ku nan ta kritik’é, el a hasi diferensia entre kristiannan ku ta prosedé di hudaismo i esnan ku ta bini di paganismo, i e aktitut aki a dividí e komunidat inhustamente. Ku e opservashon aki, san Pablo ke atvertí kristiannan di Galasia ku un di e peligernan den kumplimentu di e Lei ta hipokresia”.
Papa a destaká ku e sorprendente korekshon di Pablo na Pedro no ta un eksagerashon. San Pablo no a laga demasiado espasio na su karakter sin sa na kontené su mes, sino ku “atrobe e relashon entre Lei i libertat ta den wega”.
E aktitut di Pedro di distinguí entre kristiannan prosedente di hudaismo i esnan prosedente di paganismo tabata algu grave na wowonan di Pablo, “tambe pasobra Pedro a ser imitá pa otro disípulonan, na promé lugá di Bernabé, ku huntu ku Pablo a evangelisá presisamente e Galatanan. Inkonsiente, Pedro, ku e forma di aktua aki, en bèrdat a krea un divishon inhustu den e komunidat”.
“Pablo, den su reproche, ta utilisá un término ku ta permití drenta den profundidat di su reakshon: hipokresia. Kumplimentu di e Lei di parti di e kristiannan a hiba nan na e komportamentu hipókrita aki, ku e apòstel ta pretendé di kombatí ku forsa i konvikshon. Kiko ta hipokresia? Bo por bisa ku ta miedu pa e bèrdat”, Papa Francisco a señalá.
Ora un persona ta desaroyá un aktitut hipókrita, kontinuá e Pontífise, “e ta preferá fingi na lugá di ta su mes. Fingi ta stroba e balentia di bisa e bèrdat abiertamente i asina ta skapa fásilmente di e obligashon di bis’é semper, sea unda ku ta i apesar di tur kos. Den un ambiente kaminda relashonnan interpersonal ta ser bibá bou di e bandera di formalismo, e vírus di hipokresia ta plama fásilmente”.
“E hipókrita ta un persona ku ta fingi, alabá i ta gaña pasobra e ta biba ku un máskara riba e kara i no tin e balor di enfrentá e bèrdat. Ta pesei, e no ta kapas pa stima berdaderamente: e ta limitá su mes di biba di egoismo i no tin e forsa pa demostrá ku kurason ku transparensia”.
hipokresia “ta manera disfrasá e alma, disfrasá aktitutnan, disfrasá e moda di proseder. E no ta e bèrdat. Mi tin miedu di prosedé manera mi ta i mi ta disfrasá mi mes ku e aktitutnan aki”.
El a atvertí ku “tin hopi situashon den kua por verifiká hipokresia. Hopi be e ta skondí den e lugá di trabou, kaminda ta trata di ser amigu ku koleganan miéntras e kompetensia ta hiba na dal bo den lomba. Den polítika no ta inusual topa ku hipókritanan ku ta biba un divishon entre lo públiko i lo privá. Partikularmente horibel ta e hipokresia den Iglesia”.
Finalmente, el a animá pa no lubidá nunka e palabranan di Kristu deskribí den e Evangelio di San Mateo: “Laga bo si ta si i bo no ta no’; tur loke bo pone aserka ta bini di e malbado”. Papa a sigurá ku “aktua di otro manera ta nifiká pone e unidat di Iglesia den peliger, pa kua Señor mes a resa”.