Papa Francisco: E tarea esensial di Iglesia ta resa i eduká na resa

Pa MERCEDES DE LA TORRE | ACI Prensa

Durante e oudiensia general di djarason e 14 di aprel, Papa Francisco a destaká ku e tarea esensial di Iglesia ta “resa i eduká na resa” i a atvertí ku ora demoño “ke kombatí Iglesia, e ta hasié promé tratando di seka su fuentenan, strobando nan pa resa”.

“E tarea esensial di Iglesia ta: resa i eduká na resa. Transmití di generashon en generashon e lampi di fe ke zeta di orashon. E lampi di fe ku ta  iluminá… pero ku únikamente por bai padilanti ku e zeta di fe, al kontrario, ta paga.  Sin e lus di e lampi aki nos lo no por mira e kaminda pa  evangelisá; nos lo no por mira e kaminda pa kere bon, nos lo no por mir kara di e rumannan na kua aserka i sirbi; nos lo no por iluminá e kamber unda nos ta topa den komunidat… Sin fe, tur kos ta kai; i sin orashon, fe ta paga. Fe i orashon huntu, no tin otro kaminda. Ta pesei Iglesia, ku ta kas i skol di komunion, ta kas i skol di fe i di orashon”, Papa a splika.

Den su katisashi dediká na e tema di “Iglesia maestro di orashon” e Tata Santu a rekonosé ku  “e kustumber di  fe no ta inmediato, e ta desaroyá ku nos, e no ta rígido, e ta krese, tambe atraves di momentonan di krísis i resurekshonnnan” i a añadí ku “en bèrdat, e no por krese sin momentonan di krísis, pasobra krísis ta laga bo krese. E ta un moda nesesario pa krese, drenta den krísis”.

Papa enkurashá pa kòrda e orashonnan siñá durante infansia den famia i, despues, e enkuentronan ku otro testigunan i maestronan di orashon.

Despues, e Tata santu a señalá ku “respirashon di fe ta orashon: nos ta krese den fe tantu manera nos ta siña na resa” i a agregá ku “despues  di sierto pasashinan di bida, nos ta realisá ku sin fe nos lo no por a logr’é i ku orashon tabata nos forsa. No únikamente e orashon personal, sino tambe esun di e rumannan i di e komunidat ku a kompañá i sostené nos, di e hendenan ku nos konosé i di  hendenan kua nos ta pidi pa resa pa nos”.

Den e liña aki, e Pontífise a suprayá ku den Iglesia “komunidatnan i gruponan dediká na orashon ta floresé kontinuamente” i a rekordá e personanan ta sinti “e yamada na hasi di orashon e akshon prinsipal di nan dianan”.

“Den Iglesia tin monasterio, kombento, ermita, kaminda ta biba personanan konsagrá na Dios i ku hopi be ta kombertí den sentronan di e brio spiritual. Nan ta sentronan di komunidat di orashon ku ta bria spiritualidat. Nan ta oásis chikí den kua ta kompartí un orashon intenso i ta konstruí e komunion fraterno dia pa dia. Nan ta sélula vital, no únikamente pa e kose eklesial sino pa sosiedat mes… Resa i traha den komunidat ta hiba mundu padilanti, e ta un motor”, el a afirmá.

Den e sentido aki, Pa a splika ku “tur kos den Iglesia ta nase den orashon i tur kos ta krese danki na orashon” i a alertá ku “ora e Enemigu, e Maligno, ke kombatí Iglesia, e ta hasié promé tratando di seka su fuentenan i strobando boso pa resa”.

“Por ehemplo, nos ta mir’é den sierto grupo ku ta pone nan mes di akuerdo pa ehekutá kambionan den bida di Iglesia, tur kos ta organisashon, medionan ku ta informá, pero no ta mira orashon, no ta resa: ‘nos mester kambia esaki, nos mester tuma e desishon aki ku ta poko fuerte’. E proposishon ta  interesante, e ta interesante, únikamente ku diskushonnan, únikamente ku medionan, pero unda orashon ta?”, atvertí Papa.

Di e moda aki, e Tata Santu a resaltá ku “orashon ta loke ta abri en porta pa Spiritu Santu kende ta esun ku ta guia bai padilanti. Kambionan den  Iglesia sin orashon no ta kambionan di Iglesia, nan ta kambionan di  grupo” i a añadí ku “si stòp ku orashon, pa un momento ta parse ku tur kos por sigui padilanti manera semper, dor di flohedat, pero poko despues Iglesia ta realisá ku el a kombertí su mes den un ènvelòp bashí, di a pèrdè e eje di apoyo, di no ta poseé mas e fuente di kalor i di amor”.

Forsa di santunan

Di otro banda, Papa a destaká ku forsa di santunan ta e orashon kende “semper nan ta saka di e  ‘pos’ eterno di mama Iglesia. Ku orashon nan ta alimentá e vlam di nan fe, manera nan tabata hasi ku zeta di e lampinan. I asina nan ta bai padilanti kanando den fe i den speransa”.

“Santunan, ku hopi be na wowo di mundu ta konta poko,  en realidat ta esnan ku ta sosten’é, no ku armanan di plaka, di poder, di medionan di komunikashon, sino ku armanan di orashon”, Papa a bisa.

Den e liña akí, e Tata Santu a rekonosé ku “muhénan i hòmbernan santu no tin un bida mas fásil ku otronan, es mas, nan tambe tin nan problemanan oa konfrontá i, ademas, hopi be nan ta opheto di oposishonnan”.

Finalmente, Papa a indiká e importansia pa resa ku perseveransia, sin kansa, pues “e lampi di fe lo ta sende semper riba tera miéntras tin zeta di orashon. E ta loke ta hiba nos fe padilanti ku ta hiba nos pober bida, debil, pekador, padilanti”.

Ta pesei, e Tata Santu a invitá pa puntra nos: “mi ta resa? Nos ta resa? Kon ami ta resa? Mi ta resa manera lora òf mi ta resa ku e kurason? Kon ami ta resa? Mi ta resa sigur ku mi ta den Iglesia i mi ta resa ku Iglesia òf mi ta resa segun mi propio ideanan òf mi ta hasi pa mi ideanan sea ‘orashon’? Esaki ta un orashon pagano, no kristian”.