Paisnan miembro di Caricom lo pidi Merka pa eliminá sanshon kontra Venezuela

PARAMARIBO – Ayera a konkluí e di 43 reunion di miembronan di Caricom (Caribbean Community and Commons Market) ku a keda selebrá na Sürnam.
E paisnan miembro di Caricom a kuminsa reuní for di djadumingu i pa ayera yega na e konklushon huntu a disidi pa bai pidi gobièrnu merikano pa eliminá sanshonnan ku tin kontra Venezuela.
Caricom ta un organisashon integrá pa Antigua & Barbuda, Bahamas, Barbados, Belice, Dominica, Granada, Guyana, Haiti, Jamaica, Montserrat, San Cristóbal & Nieves, Sint Lucía, Sint Vicent & Granadinas, Sürnam i Trinidad & Tobago.
E paisnan miembro di Caricom tabatin kontrato durante 17 aña ku PetroCaribe ku ta un supsidiario di PDVSA.
Na momentu ku gobièrnu merikano a kuminsá sanshoná Venezuela miembronan di Caricom a sali perhudiká.
Awor ku preis di kombustibel ta asina haltu tur e paisnan miembro di Caricom tin ku kumpra riba merkado internashonal ku ta hasi kosto di bida muchu mas karu.
Nicolas Maduro a primintí miembronan di Caricom ku na momentu ku Merka kita tur e sanshonnan lo reaktiva PetroCaribe.