Pa varios siman kaba: Gobièrnu no ta atendé petishonnan di retiro !

WILLEMSTAD – E komishon di retiro, tin hopi siman ku e no ta atendé kasonan di retiro. Asina Pablo Zimmerman, miembro di e komishon di retiro, a konfirma awe mainta na Radio Direct. Tin indikashon ku varios dunadó di trabou ta pendiente di un kontesta di gobièrnu, riba petishon ku nan a hasi pa redusí nan personal.
Zimmerman no a risibi partisipashon ofisial, dikon no ta atende ku e petishonnan pa ontslag, pero e ta asumi ku e tin haber ku e problemanan ku tin ku e departa’mentu di labor di SOAW, ku ta ubiká na WTC. ‘Mi sa ku e parti di labor ta situa na WTC i ku e trahadónan ta den problema ku nan salú, pasobra e luga no ta saludabel. Nan ta kas na ABVO òf na kas.’

ATENSHON
E problema ku e ofisina di departamentu di labor di SOAW tin basta tempu vigente.Personal di departamentu di labor di SOAW a informa sindikato ABVO, ku nan ta enkontra problema na trabou, debi na defektonan ku tin den e ofisina na WTC. Gregroy Wilson di direktiva di ABVO e tempu ei a konfirma pa NOBO, ku tin varios asuntu ku mester di atenshon na e lokalidat aki.
Wilson a menshona ku ta trata entre otro di problema di ventilashon di airu natural, airconan ku no ta traha bon i schimmel den e ofisina. ‘’Tin trahadó ku a haña schimmel riba nan kurpa i nan tin problemanan sosial’’. Asina e sindikalista a informa NOBO. Ta trata di un situashon hopi ferelu, esla sigi bisa, ku ta pone ku e personal no ta sinti su mes komodo den e ofisina. Minister Larmonie-Cecilia a splika ku ora ku SOAW mester a sali for di e edifisio di Tauber kaminda ku tambe tabatin problema, mester a buska un edifisio grandi pa akapara e kantidat di miembro di personal ku e ministerio tin. Ta pesei a skoge pabai WTC, kaminda enberdat ei tambe tabatin problema, pero ku enretantu a remediá.
A surgi lekkage den e dak, loke ta okashona e problema aktual na WTC i gobiernu ta resolviendo e kaso aki, asina minister Larmonie-Cecilia a garantisá anteriormente.
Algun siman pasá, Etienne van der Horst, di ministerio SOAW, a bisa ku e limpiesa dje ofisinan di departamentu laboral di SOAW na WTC a tuma luga i por usa nan atrobe. Gobièrnu a pidi ADC pa midi si a elimina kompletamente e schimmel ku tabatin den e lokalidat.
Van der Horst a konfirmá ku un parti dje trahadonan ta traha mitar dia i tin un parti ku ta trahando for di kas.