Pa reskate di nos patrimonio musikal: Plataforma ‘Kaha di Òrgel’!

Willemstad- Plataforma ‘Kaha di Òrgel’, un inisiativa partikular, a wòrdu lantá riba 25 di sèptember 2021, e fecha riba kua e pionero di Òrgel Kurasoleño Horace ‘Horatio’ Sprock a fayesé. E Plataforma ta kuminsá ku su trabounan riba 26 di sèptember, e fecha natal di e ilustre Don Serapio Augustin Pinedo. Ambos virtuoso ta outodidáktiko riba e tereno di Kaha di Òrgel na Kòrsou.
E miembronan di e Plataforma ta Nidia Rosaria-Wallé, Herta Parabirsing, Marilyn Alcalá-Wallé, Erich Martina, Erwin ‘Winchi’ Martha, Elfrin ‘Finchi’ Statia i Roland Walter.

E meta di e Plataforma ta pa stimulá i mantené e uso di nos Kaha di Òrgel i e ritualnan i aktividatnan rondó di dje. E Kaha di Òrgel ta un piano di silender i ta konosí riba e islanan di ABC. E Kaha ta un forma di herensia material i imaterial menasá. Tin tiki hende ku ta disponé di e konosementu pa traha Kahanan nobo of drechá esnan mas bieu. Alabes tin menos organisadó di fiesta di Kaha di Òrgel. E otro aktividatnan rondó di dje manera e tokadónan di Wiri i e gruponan di baile folkloriko riba Kaha di Òrgel ta bira menos.
Pa kambia e rumbo e Minister di Enseñansa, Siensia, Kultura i Deporte di turno a deklará aña 2019 komo e Aña di Kaha di Òrgel, pa duna èkstra atenson na e herensia musikal nashonal menasá aki, siguí pa un siman di Kaha di Òrgel anualmente den november.
E preparashon di e aktividatnan pa e periodo benidero ta andando.