Internashonal
Pa investidura na Petro lo bai 15.000 polis i militar desplegá pa protekshon
BOGOTA – General Jorge Eliécer Camacho komandante di polis Metropolitana di Bogotá a konfirmá ku for di djasabra nan lo bai desplegá un total di 10.000 agente polisial i 5.000 militar na lugánan stratégiko durante e investidura di Gustavo Petro.
Lokual ku lo bai pasa na Bogota ta algu grandi i importante debí lo bai tin presidentenan di vários parti di mundu ku lo ta presente na e investidura di Gustavo Petro presidente nobo di Colombia. General Jorge Eliécer Camacho a splika ku for di djasabra mèrdia tin rutanan ku lo keda sera pa públiko. Ta trata aki di shete ruta diseñá ku ta kondusí for di aeropuerto, Plaza Bolívar i Palasio presidensial “Casa Nariño” kaminda e investidura lo keda selebrá.
General Jorge Eliécer Camacho a splika ku servisio di inteligensia Colombiano a informá riba posibel aktonan di terorismo durante e investidura di Gustavo Petro.
Ta p’esei a tuma asina tantu medida di seguridat.
Lo bai tin dron (avionnan no tripulá) i helikòpter ku tambe pa hasi e trabou di vigilansia for di den aire.