Outoridatnan na Spaña a arestá fugitivo mas buska na Inglatera

MADRID – Óskar de Santos Tapia direktor di kuerpo polisial na Spaña a konfirmá ku den un entrada hudisial relashoná ku narkotráfiko e siman aki nan a logra detené un e hòmbernan mas buska na Inglatera.
Ta trata aki di un hòmber Britániko identifiká komo David Ungi (30) ku ta sospechoso ku a tira un hóben ku yama Vinny Waddington mata na Liverpool.
Óskar de Santos Tapia a splika ku David Ungi a asesiná Vinny Waddington na 2015 den un diskushon pa benta di droga na Liverpool.
Servisio di Inteligensia Britániko tin informashon ku David Ungi a logra bandoná Inglatera den 24 ora i a bai skonde na Coín ku ta keda serka di e sentro turístiko na parti Sur di Marbella.
Na momentu ku David Ungi a keda detené e tabatin na su residensia vários arma di kandela entre nan un metrayur, dos revòlver kaliber 38 mm i 15 kilo di kokaina.
Óskar de Santos Tapia a splika ku lokual ku lo bai pasa ta ku lo bai wak si ta ekstraditá David Ungi pa Inglatera mesora of ta trata su kaso di narkotráfiko na Spaña.
Pero ku tur probabilidat lo ekstraditá David Ungi pa e kaso di asesinato ku ela keda kondena kaba den korte di hustisia na Inglatera.