Outoridatnan na Colombia: A diskubrí sentro di falsifikashon di dòler na frontera ku Venezuela

BOGOTA – Wilson Ruiz Orejuela aktual minister enkargá ku hustisia na Colombia a konfirmá ku agentenan polisial a bin diskubrí un imprenta na un edifisio bandoná na Maicao (La Guajira) ku tabata imprimí míles di dòler falsu pa dia. Tin indikashon ku e delinkuentenan ku polis a detené tabata usa un imprenta industrial ku por a produsí entre $ 5 pa mil i $ 10 mil falsu pa dia.
Parse ku e dòler falsu nan aki ta di kalidat hopi haltu i ku mayoria tabata keda manda via Venezuela pa Panamá.
Wilson Ruiz Orejuela a splika ku nan a detené 4 persona ku lo tin ku bai duna kuenta i rason di nan operashon na hustisia.
Kabesante di e geng di kriminal aki a keda identifiká komo José Alfonso Díaz Aguilar ku segun fiskalia general tabata enkarselá kaba un tempu pa mesun tipo di krímen kometé. Otro nòmbernan ku a keda detené ta Greyser Deivis Socarrás Rivera kende tabata esun enkargá pa imprimí e biyetenan di dòler falsu i Marco Tulio Pérez Charris kende tabata esun enkargá ku transporte di e bultonan di dòler falsu. Wilson Ruiz Orejuela a bisa ku nan a konfiská tur mashin ku tabata keda usa pa imprimí e dòlernan falsu, mas $500 mil ku tabata na efektivo.