Otro aña tur amtenar i otro trahadó lo haña 6% bonus di fakansi

WILLEMSTAD, Den e análisis ku Komishon Supervishon Finansiero a traha ariba e konsepto di presupuesto pa 2023 i ku e komishon a plama for di otro manera ta bati Huda, tabatin un nota positivo.
Praktikamente e uniko punto positivo ku por a haña den e karta di CFT ta ku otro aña tur amtenar i otro trahadó di gobiernu lo haña 6% di bonus di fakansi.
Otro detaye interesante ku CFT a referi na dje ta ku otro aña lo kuminsa kobra Omzetbelasting di forma outomatisa.
CFT a nota tambe ku ora e kambio drenta na vigor pa 2023 esei ta nifiká ku otro aña gobiernu lo kobra 13 luna di belasting den un aña pasobra desember 2022 tambe ta kai aden.
Pero na mesun tempu ku gobiernu a haña instrukshon pa baha gastu di material i personal, a reservá 15 mion florin pa paga 200 empleado nobo.
Esei ta resultado dje palabrashon den e areglo VVU, Vervroegde Uitdienst treding kaminda a palabra ku pa kada 3 amtenar ku renunsia, tin mag di tuma 1 amtenar of werkman of loke sea.
O sea ku na kada Ministerio tin mag di tuma 12 amtenar nobo pero na mes un tempu no a tene kuenta ta kuantu amtenar ta bira lomba pa gobiernu.
No ta menshona nada di yena funshonnan kritiko i indispensabel pasobra nan a ripara ku 550 amtenar i edukador a bandona gobiernu pero ku no a tuma personal nobo pa remplasa nan.
CFT ke sa kuantu hende a bai laga gobiernu pa sa kuantu plaka mester pa paga nan.
Pero manera e presupuesto ta formulá, ta papia vakatura pa reparti.
E fase ei no ta kuadra ku e tema.

Den e presupuesto ta papia ku gastunan di gobiernu tambe ta keda afektá pa inflashon i pa no menos ku 11 mion florin.
Pero e cherry riba e bolo ta kaminda gobiernu ta konta su mes riku sperando di haña 18 mion florin for di wega di plaka i casino sin ku e lei tei mes.
Mañan nos lo analisá kon CFT a plama e konsepto di presupuesto di minister di Finansa foi otro pero esnan yamá pa supervisá i hala atenshon dje minister, sea no ta domina e materia of tin miedu di represaya.