Organisashon di Trump a keda deklará kulpabel pa froude fiskal

NEW YORK – Ayera un grupo di 9 hurado a deklará e dos entidatnan koperativo di e Organisashon di Trump kulpabel di 17 kargo ku ta inkluí asosashon di falsifikashon di dokumento.
E veredikto ku a keda tuma den korte penal di New York a dura aproksimadamente 10 ora di deliberashon repartí den dos dia.
Outoridatnan na New York a sigurá ku nan lo bai kontinuá ku mas investigashon den e negoshinan chueko ku e organisashon di Trump tabata hasiendo promé ku a hala nan atenshon.
E investigashonnan kontra e organisashonnan di Trump a kuminsá for di 2019 i ku finalmente a keda atendé den korte Supremo na New York.
Pa kuminsá e kompania di Trump lo tin ku sali paga un but di $1.6 mion i e oudiensia di sentensia ta programa
pa dia 13 di yanüari di aña 2023.
Abogadonan ku ta representá Donald Trump a deklará despues di e wisio ku nan lo bai apelá.
Miéntras ku Alvin Bragg fiskal di distrito di Manhattan a bisa ku defensa di Donald Trump tin derecho pa apelá pero ta pensa ku ta tempu pèrdí ya ku tin tur prueba ku su organisashon a faya garafalmente ku pagonan di impuesto i falsifikashon di balor di su propiedatnan.
Donald Trump na su turno tabata bastante rabia ku e veredikto debí ku e ta kulpa partido Demokrata ku ta buskando pa daña su reputashon i pa e no ta kandidato presidensial na 2024.