Ordenashon di Jose Luis Domínguez Sandoval komo diákono

Djasabra 16 di òktober den Katedral di Pietermaai

Jose Luis Domínguez Sandoval ta un seminarista mehikano di 30 aña di edat. El a nase na Guadalajara, Jalisco na Mexico, ta e di dos yu di un famia di 3 ruman. El a drenta na e seminario diosesano i misionero _Redemptoris Mater_ di Guadalajara, e siudat kaminda el a nase, na e aña 2008. Despues di aña largu di estudio na 2009 el a bin Kòrsou huntu ku otro sinku seminarista pa yuda inisiá i krea un seminario nobo den nos diósesis di Willemstad.
Jose Luis a biba e promé añanan di seminario akí na kas di diferente famia den e barionan di Juan Domingo i Charo, te ora ku Mgr. Luis Secco a haña un lugá pa tur e seminaristanan por a biba huntu de e mesun kas. El a risibí tur e diferente rito di preparashon pa ser ordená diákono aki na Kòrsou, esta admissio, lektorado i akolitado. El a studia filosofia i teologia den nos kas di formashon aki den nos diósesis: “Seminario _Redemptoris Mater_ (Mama di e Redentor) di Willemstad”, ku ta keda den e mesun edifisio ku un tempu tabata e monasterio Mama di Dios, patras di misa di Santa Famia. Tambe Jose Luis a kompletá su estudionan filosófiko i teológiko na diferente kaminda; el studia dos aña na Perú i dos aña na Suisa, kaminda el a haña e titulo di bachiller den filosofia pa e Universidat Urbaniana di Roma, bachiller den teologia pa e fakultat di teologia di Callao, Perú; i e Licenciatura den teologia pa e fakultat di teologia di Lugano, Suisa.

Djasabra 16 di òktober na misa di Pietermaai e lo keda ordená komo diákono pa nos diósesis i e ta hopi kontentu ta un misionero i di sigui Hesukristu den e mishon den e islanan aki.