Oposishon a pidi reunion di Senioren Convent riba refineria di Kòrsou

WILLEMSTAD.Petishon reunion di “Senioren Convent” riba desaroyonan rondó di Refineria di Kòrsou.
Manera ta konosí, ya ta algun aña ku Gobièrnu di Kòrsou ta hasiendo esfuersonan pa yega na un operadó pa e instalashonnan di nos Refineria.
Di e mesun forma aki, gabinete Pisas mas ku 1 aña pasá a anunsiá ku esaki ta un prioridat pa desaroyo ekonómiko di nos pais.
Den un entrevista na televishon Aprel último, Promé Minister Pisas a deklará públikamente ku e ta traha, despues papia i komo tal, dia promé di Yüni 2022 e lo entrega yabinan di nos refineria na e operadó nobo.

Entretantu ya ta dia 7 di sèptèmber 2022 i te awor no tin klaridat riba e proseso pa yega na un operadó pa e refineria.
Mas aleu, últimamente ta biba hopi preokupashon den komunidat den kuadro di informashonnan ku ta sirkulá (entre otro riba plataformanan internashonal) enkuanto e “preferred bidder” ku Gobièrnu di Kòrsou ta negoshando kuné.
Durante di e reunion públiko enkuanto tratamentu di e programa di gobernashon, Promé Minister Pisas a deklará ku e ta dispuesto na porfin (despues di mas ku 1 aña) duna Parlamento di Kòrsou informashon riba e proseso aki, sinembargo mirando e delikades di e informashon, esaki mester tuma lugá den un “Senioren Convent”.
Komo tal i respetando e petishon di Minister Presidènt, suskritonan ta aserka bo persona ku e petishon pa di forma urgente, konvoká un “Senioren Convent” konforme Reglamento di Òrdu i invitá na e reunion aki, Minister President, sr. Gilmar Pisas i direktor interino di RDK, pa asina informá e lidernan di Frakshonnan den Parlamento di e último desaroyonan enkuanto e proseso pa yega na un operadó pa nos Refineria.