Ola di kalor na Hapon: A pone ku 55 hende a muri i 14.353 persona a keda hospitalisá den apenas un siman

TOKIO – Segun sifranan ofisial di departamentu di Salubridat na Hapon un total di 55 persona a muri i 14.353 persona a keda atendé na diferente hospital na nivel nashonal den apénas 1 siman di tempu.
Esaki ta debí na e kalor sofokante ku ta asotando e pais.
E sifranan aki a keda registrá entre 27 di yüni pa 3 di yüli.
Temperaturanan di entre 36.4 grado Celsius pa 39.8 grado Celsius a keda registrá durante e siman 27 di yüni pa 3 di yüli.
E suidatnan kaminda tabatin mas kaso di hospitalisashon i morto registrá tabata na Saitama i Chiba kaminda tabatin dia ku temperatura a alkanse yega na kasi 40 grado Celsius.
Un total di 57 porshento di e hendenan ku tabata bira malu i muri tabata hendenan mayornan di edat riba 50 aña.