Ofisina di Turismo ta hopi kontentu ku Sandals na Kòrsou

WILLEMSTAD – Ofisina di Turismo di Kòrsou (CTB) ta hopi satisfecho ku e kontribushon ku Sandals ta duna na desaroyo di turismo di Kòrsou.
Na yüni último un kantidat rekòrt di turista merikano a bishita Kòrsou. Hugo Clarinda, di Ofisina di Turismo di Kòrsou a bisa na Z 86 ku esaki ta un desaroyo hopi positivo.
Ta despues ku Sandals a habri na Kòrsou, a konstata e desaroyo aki.
Sandals a habri na juni i por mira klaramente e efekto ku Sandals ta hasiendo riba e merkado merikano.
‘Ta p’esei nos ta lamentá ku tin hopi kompartimentu (sharementu) di kosnan negativo tokante Sandals.
Clarinda: ‘’Nos ta haña ku ta un lástima ku nos mes ta sigi propaganda e tipo di kosnan aki.’’
Segun Clarinda ta normal ku na tur hotel tin hende ku ta kontentu i tin hende malkontentu. Na Sandals e no ta otro. Solamente mester perkurá pa e porsentahe di hende ku ta malkontentu ta hopi chiki. Clarinda a sigi bisa ku esei ta loke ku por mira tambe na Sandals. ‘E hendenan ku tin reklamo, ta hopi tiki kompará ku e kantidat grandi di hendenan ku ta sumamente satisfecho ku nan estadia na e hotel. Pero tòg ta mira ku nos hendenan lokal ta propaganda e notisianan negativo so i no ta dediká atenshon na e notisianan positivo.
Ofisina di Turismo ta hopi kontentu ku e presensia di Sandals na Kòrsou. I nos ta mira e efekto ta impreshonante, e efekto ku Sandals ta hasi riba nos sifranan di prinsipalmente e merkado merikano ku ta un merkado ku Korsou ta deseá pa e krese. Awor ku yudansa di Sandals, finalmente lo mira un impakto hopi fuerte riba e merkado merikano.
REAKSHON
DI SANDALS
No opstante e komentarionan negativo, Sandals ta sigi traha i pusha pa ta eksitoso. Ta hopi mion a invertí den e proyekto miéntras ku tin 800 hende den servisio. Pa loke ta trata personal tambe por tin hende ku ta malkontentu, pero esei ta algu ku ta pasa tur kaminda, Clarinda ta bisa. Pero mester pone e kosnan den perspektiva. Pasobra si bisa ku hopi trahadó ta malkontentu, saliendo for di e punto di bista di 800 empleado, ta un remarke hopi suphetivo. Ta p’esei mester pone e kosnan den e konteksto korekto.
Ofisina di Turismo regularmente tin kontakto ku Sandals pa wak kon kos ta bayendo. E kantidat di turista ku ta keda einan ta impreshonante i CTB ta mira ku e ta stimulá tambe e positivismo. Pasobra no ta solamente na Sandals, e turista merikano ta keda, pero tambe na e otro hotèlnan. Esaki ta konsekuensia dje promoshon ku Sandals ta hasi pa Kòrsou na Merka.
‘’Si tin problema, nos mester atendé nan e forma korekto i no den media. Konfliktonan mester haña atenshon den seno di gerensia i sindikato, esei ta e mihó forma pa atendé ku e asuntunan aki.’’, ta palabranan di Hugo Clarinda.
POOL
Relashoná ku e insidente ku e pool, Ofisina di Turismo tabatin kontakto ku Sandals, meskos ku tur asuntu den kua tin turista envolví.
E intenshon ta pa por duna e turista e atenshon nesesario.
Hugo Clarinda: ‘’ Pa e turista sa ku ta take care di dje. Ta importante kon ta atendé despues di un insidente, pa e persona por bai satisfecho for di nos pais.’’ Den e kaso dje pool na Sandals, tambe esei tabata e kaso.