Nul-uren kontrakt no por dura mas ku 6 luna

WILLEMSTAD – Komunidat no ta dispone ainda di sufisiente informashon tokante di e asina yama Nul uren kontrakt. E konsekuensia di esaki ta ku tin basta konfushon riba e topiko. Esaki tku ta e kaso prinsipalmente ora ku ta papia di e aplikashon i intepretashon di e Nul-uren kontrakt. Randolph Gijsbertha direktor interino di SOAW a bisa na Radio Hoyer, ku e tipo di kontrakto aki no ta kompletamente reglá aktualmente den nos arbeidsregeling 2000. Pero ora ku na aña 2000, a hasi kambionan den nos leinan laboral, den Burgerlijk Wetboek, a hasi menshon di e nul-uren kontrakt. Segun Gijsbertha, mester lesa tambe den e Memorie van Toelichting, kiko tabata e espiritu i dikon ta aplika e Nul- uren kontrakt.
Gijsbertha ta sigi splika ku por tin e tendensia di pensa, debi na maluso di sienos reglanan, ku mester ku uitzendburo, e nul-uren kontrakt ta algu negativo. Pero ta importante pa mantene bo na e reglanan korespondiente i aplika i interpreta e kos bon.
Gijsbertha ta bisa: Un nul-uren kontrakt ta kasi identiko na un oproep-kontrakt. E uniko diferensia ta, ku e no por tin un durashon di más ku sèis luna. Na momentu ku bo tin un trahado i bo ta bise mi ta roep bo op, anto e oproep, ta dura mas ku seis luna, trahadó por eksigi pa e haña un akuerdo di trabou identiko na nos leinan laboral. No por bai dune e ora ei un kantidat di ora menos ku e promedio di oranan ku ela traha pa bo durante di e aòa ei.
Relashona ku e pago ora ku ta trata di un Nul-uren kontrakt, ta paga pa e kantidat di oranan ku a traha. Pero tin un aspekto importante , pasobra e trahado ta keda stand by, en espera di e yamada pa bai traha. Dor di keda pendiente ta pèrde oportunidat di hasi algu otro. Pa esei, e mester haña un kompensashon.
Gijsbertha ta sigi splika ku un otro punto ta tambe ku na momentu ku yama un hende pa bai traha, i ku persona bisa ku e ta malu, ta nifika ku mester pag’é. Banda di esei ku si no yama e persona ku sufisiente antisipashon, òf a surgi kambio den e palabrashon dje dianan pa traha,mester paga e trahadó, pasobra ela prepará su mes pa bai traha.
Un otro aspekto importante ta ku mester paga e prima di seguro pa e trahadónan ku tin Nul-uren kontrakt tambe. Ademas na momentu ku e trahadó ta malu, mester page e oranan ku a palabra kune pa traha.
Randolph Gijsbertha ta resumi ku konkretamente un Nul-uren kontrakt ta paresido na un oproepkontrakt. Den e kaso aki mester palabra ku e trahado i pone eksplisitamente den kontrakt kon ta regla asuntu di pago i otro kompensashonnan ku e trahado mester risibi. Por ehempel si e trahado sigi traha mas ora ku loke a yame pe e dia ei, mester page overtime. Mester zeg op tambe un nul uren kontrakt. Ta pesei e nul uren kontrakt tambe ta kubri dor di e ontslagrecht.
Gijsbertha ta konklui ku e remarke ku un Nul-uren kontrakt no ta algu malu, pasobra tin trahado ku ta prefera di traha fleksibel i no ke traha 8 ora. ‘Pero mester apliká i intepretá e reglanan manera mester ta. Pasobra den mayoria kaso e hendenan ku tin nul uren kontrakt ora ku nan haña problema i bai korte, ta haña rason tambe.