NOVASHON DEN SERVISIO NA KLIENTE DI AQUALECTRA KU ‘MI AQUALECTRA DIGITAL’

WILLEMSTAD. – Den kuadro di Aqualectra su kompromiso pa krese i bira un kompania ku konstantemente ta pone klientenan komo punto di enfoke sentral den tur loke ku ta keda hasí, e kampaña ‘Mi Aqualectra Digital’ a keda lansá djaluna 16 di mei.
E kampaña tin e meta pa Aqualectra duna kontinuashon na e proseso di transishon pa klientenan bira mas digital i efisiente den maneho di konsumo di awa i koriente.
Durante e kampaña lo brinda informashon i instrukshonnan nesesario pa yuda klientenan suskribí na MiKuenta.
Komo parti di e kampaña Aqualectra lo rifa premionan atraktivo durante tres sorteo, manera por ehèmpel krédito pa kubri gastunan di awa i koriente. Tur kliente ku suskribí òf ‘update’ nan informashon personal riba e portal di MiKuenta durante e periodo aki te ku 16 di yüni ta partisipá outomátikamente den e sorteonan.
Durante e mesun periodo aki i lunanan benidero Aqualectra lo lansa servisionan digital nobo pa sigui hasi bida di su klientenan mas fásil.
Digitalisashon ta un di e tantísimo métodonan ku Aqualectra a skohe pa trese inovashon i asina mehorá su servisio na kliente durante e lunanan benidero. Manera ta konosí, e portal di MiKuenta ya a keda introdusí den pasado i e ta e promé plataforma digital pa klientenan di Aqualectra.
Fuera di MiKuenta, e proyekto di Meter Inteligente (AMI), den kua Aqualectra ta instalando meternan inteligente di awa i koriente rònt Kòrsou, tambe ta forma parti di e infrastruktura di Mi Aqualectra Digital.
Aqualectra a nota ku ainda tin un parti di nos poblashon ku no a logra suskribí na MiKuenta.
Den futuro Aqualectra lo sigui outomatisá su servisio na kliente gradualmente ku servisionan digital nobo i den mesun rosea, sierto servisionan ku nos konosé pa hopi aña lo stòp di eksistí.
Hustamente pa e motibu aki, durante e próksimo luna e enfoke ta keda riba yuda fasilitá e kliente pa forma parti di Aqualectra su transishon digital den servisio na kliente.