Notisia di polis

Hit & Run

Kralendijk–Djadumingu 29 di ougùstùs un aksidente a tuma lugá riba Kaya Nikiboko Nort. Un pikòp a dal den un skuter i a purba sigui kore bai. Un siudadano atento a logra blòkia e pikòp ku tabata ke kore bai, nèt riba e krusada di Kays Nikiboko Nort i Kaya Sabana. Personal di ambulans a logra atendé ku shofùr di e skuter na e sitio mes I despues e por a bai kas. Despues di kontrol a resultá ku e shofùr di e pikòp no tabatin un reibeweis ni prueba di seguro bálido. El a haña un prosèsferbal pa esaki. Investigashon den e kaso aki ta andando.

Outo ta dal peaton
Djárason promé di sèptèmber, alrededor di 8.30 or di mainta, sentral di polis a risibí notifikashon tokante un aksidente ku un peaton riba Kaya Korona. Ambulans a transportá e víktima pa hospital pa tratamentu médiko.

Entrada hudisial na Tera Kòrá
Djárason promé di sèptèmber den oranan di mainta a hasi un entrada hudisial den un kas situá den bario Tera Kòrá. Durante di e entrada hudisial a detené un hòmber di inisial G.S.R. di 37 aña di edat en konekshon ku violashon di de Lei di Opio BES. Tambe a konfiská un kantidat grandi di medionan narkótiko. Ta investigando e kaso.

Hòmber ta kai for di baki di pikòp
Den oranan di mainta riba djárason promé di sèptèmber, un hòmber a kai for di den baki di un pikòp ku tabata koriendo, na momentu ku diripiente e klep a habri. Shofùr di e pikòp mes a hib’e hospital pa tratamentu médiko. Na hospital un patruya a papia serio ku e shofùr i a konsehá e pa laga pasahero sinta den outo na lugá di den baki.

Ladronisia for di outo

Riba djaluna 30 di ougùstùs a drenta keho di ladronisia for di un outo ku tabata stashoná na un parke situá na Kaya Grandi. Deskonosínan a kibra e bentana na e banda di shofùr i a bai ku un pòtmòni ku sèn kèsh i vários tarheta, un telefòn kolo pretu di marka Samsung, un kaha kolo blou ku vários artíkulo pa sambuyá, manera entre otro un ‘verrekijker’, un reguladó di aire, sinku brel chikitu pa sambuyá, un aparato pa midi oksígeno i algun hèrmènt. Ta investigando e kaso.

Ladronisia na sitio di sambuyá

Djaluna 30 di ougùstùs a drenta keho di ladronisia na un bich na e sitio di sambuyá 1000 steps. Entre 12 or i 1 or di mèrdia deskonosínan a kue dos tas I a plama e kontenido den e mondi djis ei banda. E deskonosínan a bai ku un tas di snòrkel, un telefòn i sèn kèsh for di den e tasnan. Un kámara, un otro telefòn i algun tarheta di banko si nan no a bai kuné. Ta investigando e kaso.

Winshil destruí
Djaluna 30 di ougùstùs a drenta keho di destrukshon. Den e mardugá di djadumingu 29 di ougùstùs pa djaluna 30 di ougùstùs deskonosínan a destruí winshil di un outo ku tabata stashoná na un kas situá na Kaya Trupial. No a bai ku nada for di den e outo. E kaso ta bou di investigashon.

Bo a mira algu sospechoso? Yama 717 8000 òf e liña di tep anónimo 717 7251.