Nota di Deporte: Lesa korant ta duna amigu “Chu” Martis “Stress”…

No ta probabel ku Eduard, “Chu” Martis lo lesa loke nos a skibi aki, paso e ta bisa di no ta lesa korant pa e no haña “stress”. Si e tin amigu riba “FB” kaminda si e ta hopi aktivo, “screen-shot” e loke nos a skibi i manda pa amigu “Chu”.

Paso ora bo opta pa postulá bo mes pa presidente di kualke federashon importante di Pais, lo bo tin di soportá loke ta bini aserka.
Niun hende no ta krítika “Chu” personalmente, sino tin nan opinion riba e deporte i ku hopi biaha si ta bon, mester sirbi pa evaluashon i mehorá, no pa haña “stress”.

Si bo no por o sa kubo no por ku poko diferensia di opinion hamas bo mester a postulá bo mes pa presidente di CSB ku tras di FFK i FEBEKO ta e federashonnan di mas grandi di deporte na Kòrsou.
“Chu” ta Yankees meskos kumi, e ta zundra Gerrit Cole regularmente, ora bo ta den sierto posishon lo bo haña krítika i lo bo skucha kosnan ku tin biaha bo no ta di akuerdo kuné o no ta dushi. Dia tabatin elekshon pa presidente di CSB, nos klup a bini ku Kenneth Pieter, mi opinion tabata ku mi no konosé Kenneth Pieter den sòftbòl, i ounke mi no a bai reunion, ni vota, m’a skibi i bisa ku si ta Taffy de Jongh e lo sostené Eduard Martis, siendo ku e ta hòmber di softball Fastpitch.
Mi no a ni informá pa ken Pichingolo a vota, paso mi interes ta pa Pichingolo trata di train mas mihó tur biaha ku tin training.
Si mi tabata sa ku e posishon ta duna “Chu” “stress”, lo mi a konsehá pa bini numa ku Kenneth Pieter, paso no ta e intenshon nunka pa hasi “Chu” malu.

Ora bo ta presidente di kualke federashon, o bo tin kualke posishon ku ta nifiká algu, bo tin di atendé ku kosnan tin biaha ménos dushi tambe. Sino keda leu, si bo no por wanta kayente, bo no mester a drenta kushina amigu “Chu”..