Nos pueblo ta na bispu di transishonnan grandi

WILLEMSTAD. Konseho Sosial Ekonomiko ta konsiderá ku ta di sumo importansia, teniendo na kuenta e transishonnan grandi menshoná pa invertí den ahustenan nesesario.
· Invershon den formashon, kapasitashon i desaroyo kontinuo di personanan (lifelong learning)
· den organisá un infrastruktura ku ta ofresé hendenan e posibilidat pa permanesé empleá den nan trabou aktual
· o pa rekapasitá nan pa trabounan nobo ku ta ofresé nan un remunerashon hustu, seguridat laboral i un mihó grado di protekshon sosial.
“Ta nesesario invertí aworakí den nos sektor públiko, den nos futuro poder di generá entrada pa medio di ampliashon di nos kapasidat di inovashon pa asina nos por ta mas produktivo, den amplia inklushon pa medio di mas igualdat di oportunidat i di un repartishon mas hustu i di un kalidat di bida mihó i sostenibel.
Mester invertí den alsa nivel di nos prosperidat.”

Prosperidat amplio
Pa por alkansá a metanan menshoná, nos mester konsentrá riba e konsepto di prosperidat amplio.
Pa realisá esei mester tene debido kuenta ku loke realmente ta biba den komunidat i preokupashonnan básiko ku ta biba bou di nos hendenan.
Mester kontesta preguntanan manera:
· Mi ta biba den komodidat i seguridat?
· Kon ta pará ku futuro di mi yunan?
· Mi por sigui paga tur mi obligashonnan finansiero fin di luna?
· Mi formashon ta brinda posibilidat pa haña un trabou adekuá?
Tur ta pregunta ku ta relatá na e konsepto di ‘prosperidat amplio’ ku tin di aber ku kalidat di bida i ku kalidat di e ambiente den kua nos ta biba i e interakshon entre nan dos.