Lokal
Nos minister kampeon biahero ta bai konferensia Punta Cana na “Saudi-Caribbean Investment Forum”
WILLEMSTAD. Minister di Desaroyo Ekonómiko, sr. Ruisandro Cijntje a sali pa Punta Cana ku un delegashon di MEO i tambe direktor interino di CINEX, sra. Jeanette Bonet pa partisipá na e “Saudi-Caribbean Investment Forum”.
E foro aki a keda organisá pa CAIPA (Caribbean Association of Investment Promotion) kual ta e organisashon enkargá ku promoshon di invershon den Karibe.
Durante di e evento aki, Kòrsou ta haña e oportunidat pa presentá proyektonan ku ta rekerí invershon i e ta brinda Kòrsou e oportunidat pa posishoná nos mes komo un país atraktivo pa invershonistanan di Saudi-Arabia. Kòrsou ta un di e tiki paísnan ku a risibí un invitashon personal pa por a presentá nos strategia di kresementu ekonómiko i por konsiderá esaki komo un kontinuashon di tur e kombersashon nan ku nan a hiba na Dubai. Minister Cijntje lo dialogá ku diferente invershonista riba e area di desaroyo di varios sektor ekonómiko na Kòrsou i tambe nos produkto turístiko.