Nos mester di silensio

Outor: Mons. Rómulo Emiliani, c.m.f.

Nos mester di silensio! Sí nos mester di silensio den nos bida pa por biba na plenitut. Nos mester di silensio den nos kurason pa kontemplá e maravianan ku ta rondoná nos: e naturalesa ku su diferente tinta bèrdè, e kolónan di amapola, di leli, di rosanan, e formanan kaprichoso di barankanan, e forma mahestuoso di serunan, e humildat di seritunan, e pas di e vayenan. E beyesa di un atardi, òf di un anochi di luna, òf di un dia yen di solo ta pèrdè pasobra nos falta silensio pa kontemplá nan.

Mester di silensio pa meditá den e gestonan akí di amor ku hopi hende tin pa nos. Pa saboriá e ternura di un mama pa su yunan. Pa kontemplá e komprenshon di nos amigu ku a faya ku nos den e momentonan di krísis. Pa kontemplá e aktonan miserikòrdioso i yen di pordon ku hendenan ku stima nos tabatin.

Nos mester di silensio pa mira e beyesa skondí den e kara shushi i di mala mucha di un mucha, den e inosensia di un beibi drumiendo, den e grandesa skondí di un mucha chikí ku ta bai kresiendo i ta bai birando un hende grandi poko poko i ku ya tin e grandesa akí den potensia, den rais.

Mester di silensio pa por kontemplá grandesa di tantu bida balente, ku a brinda esnan di nan pa hasi di e mundu akí un mundu mihó i ku nan tabata mashá serka di nos brindando nan pan, nan konseho, nan amor, nan pordon, nan komprenshon.

Mester di silensio pa kontemplá e pasenshi ku algun tabatin ku nos, pa kontemplá tambe e dikon skondí, pero dramátiko, ku ta inkluí i ku ta move algun hende pa realisá aktonan bon i otronan pa realisá aktonan ofensivo i dañino. Mester di silensio pa mira den e últimonan aki, nan trouma, nan frustrashon, nan frakasonan, e skuridat ku poko poko ta enbolbí nan bida i ku ta hiba nan na esaki. Mester di silensio pa pordoná nan i komprondé nan situashon pober.

Mester di silensio pa atmirá gestonan simpel, pe kargá di amor ku hopi hende ta realisá den bida. Mester di silensio p’asina e esposo skucha batimentu di e kurason amoroso i tierno di su esposa, su fidelidat, su pasenshi i visevèrsa. Pa falta di silensio oportunidatnan maravioso di stima ta hoga, pasobra e bochincha ta stroba nos pensa, e bochincha ta stroba nos reflekshoná, e bochincha definitivamente ta stroba nos stima.

Nos mester di silensio pa kontemplá presensia di Dios ku ta den bo, ku ta den ami; e presensia di Señor ku ta nos eterno kompañante, nos amigu di mas, esun ku semper ta stima nos apesar di nos pikánan.

Nos mester di silensio pa por skucha Dios. Silensio ta nesesario pa kontemplashon di e Bèrdat. Lesa e palabra de Señor i resa den silensio lo yuda nos sa ken Dios ta pa nos.

Nos mester di silensio pa skucha bos di esun ku ta sufri, bos di esun ku ta padesé, e lamento di esun ku mester di nos. Tin hopi lamento di soledat, di miedu, di doló, di hamber, i di bashí di Dios. Tin hopi hende ku ta sufri i e bochincha den kua nos ta biba ta stroba nos kontemplá sufrimentu i doló i asina tantu hende. Nos mester di silensio pa skucha nan.

Nos mester di silensio pasobra lenga ta un arma masha peligroso, i fiha nos mes kon nos ta usa nos lenga. Kiko nos ta bisa?, Kon nos ta bis’é?, Kiko nos ta transmití  generalmente? Hopi be nos ta transmití angustia, sospecho, miedu, intriga, tenshon. I hopi be nos no ta laga pa otronan hasi nan silensio. Ku nos bochincha nos ta hòrta e pas ku otronan lo por tabatin.

Den silensio, Maria, den un profundo orashon a risibí e anunsio di e angel, i den silensio e Verbo a bira karni. Den e silensio di un anochi yen di strea, Hesus a nase apartá di e siudat. Den e silensio di e tayer di Nazaret, Hesus tabata traha i meditá den kosnan di su tata. Den e silensio di serunan i lagonan Hesus tabata papia ku su Dios Tata.

Den silensio a konsebí obranan grandi artístiko, sientífiko i filosófiko. Den silensio hopi hende a bira grandi, pasobra nan tabata por a pensa.

Dikon bo no ta hasi silensio bo mihó aliado den e sosiedat asina intrankil? Den silensio lo bo haña pas, ekilibrio, serenidat i prinsipalmente den silensio lo bo topa ku Dios.