No tin trabou pa un toubot di su tamaño…….. Desishon pa benta di Orca VI no ta kos di awor

Willemstad- E desishon pa bende e toubot Orca VI no ta kos di awor, sino e ta un proseso ku a inisiá for di 2015 ku aprobashon di hunta di komisario di e tempu ei.
Orca VI ta un toubot speshal, destiná pa hasi trabounan riba laman ganchu i di distansha largu.
Tambe e tin e meta pa duna asistensia na proyektonan ‘off-shore’.
Debí na su grandura, e toubot no ta destiná pa hasi trabounan di tou den haf manera si ta e kaso ku tur otro toubot di KTK.
Fuera di esaki, e no a resultá di ta un toubot ku por a ofresé un tarifa kompetitivo pa trabounan den region.
Pa e motibu aki KTK, konforme un prosedura dirigí riba logra máksimo rendimentu pa e kompania, a subi merkado internashonal en buska di un kumpradó.
KTK a atkerí Orca VI na 2010 en bista di un vishon pa realisá mas trabou di tou riba merkado internashonal.
Na 2014 e gerensia nobo di KTK a laga hasi un evaluashon di efisiensa i efektividat di e flota di KTK.
For di e tempu ei a yega na e konklushon ku Orca VI no tabatin un funshonamentu rendabel kompará ku e otro toubotnan den e flota di KTK. Orca VI simplemente no ta un barku kompetitivo pa trabounan riba laman di distansha largu.

Un di e motibunan di esaki ta su uso di kombestibel (marine diesel) ku ta hasi su funshonamentu mas karu ku otro barkunan riba merkado.
E otro barkunan riba merkado ta usa ‘fuel oil’, kual ta muchu mas ekonómiko pa trabounan di distansha largu riba laman.
Pa trabounan di tou den region KTK tin otro toubot den su flota ku ta mas efisiente i kompetitivo kompará ku Orca VI.